Dia 28 di september 2026 ta conmemora Dia Internacional pa Acceso Universal na Informacion cu un presentacion special y inauguracion di e exposicion “Letra y Consenshi: Balor Humano di un Pueblo” na Post Aruba N.V.
cuminsando 5:30 p.m. pa 7:30 p.m. Durante e encuentro lo tin diferente presentacion tocante importancia di acceso na informacion y su impacto riba nos comunidad.
Programa
5:30 p.m. – 5:40 p.m.
Recepcion pa invitado
5:40 p.m. – 5:45 p.m.
Introduccion y bonbini
5:45 p.m. – 5:55 p.m.
Birgit Kreykenbohm – UNESCO Aruba
The Importance of the International Day for Universal Access to Information
5:55 p.m. – 6:15 p.m.
Iliene Corsen – Post Aruba N.V.
Kico ta berdad den un era di demasiado informacion?
6:15 p.m. – 6:35 p.m.
Johny van Eerden – Archivo Nacional Aruba
Ken su bos nos ta scucha den archivo?
6:35 p.m. – 6:45 p.m.
Renwick Heronimo – Biblioteca Nacional Aruba
Presentacion di e exposicion “Letra y Consenshi”
6:45 p.m. – 7:30 p.m.
Clausura, oportunidad pa bishita e exposicion y intercambio
E tema cu UNESCO a scoge pa e aña aki ta: “Mantene integridad di informacion den era digital: e papel di acceso na informacion pa atende desorden informativo.”
E tema ta subraya cu, den un epoca caracterisa pa circulacion rapido di informacion digital, no ta suficiente pa tin acceso na informacion. E informacion mester ta confiabel, verificabel y presenta den su contexto corecto. Acceso na fuente autentico y documentonan original ta esencial pa combati desinformacion, informacion engañoso y distorsion di hecho historico.
Den e sentido aki, inauguracion di “Letra y Consenshi” tin un significado special. E exposicion ta confronta nos cu un periodo den historia di Aruba den cual acceso na educacion, palabra skirbi y informacion tabata limita pa gran parti di poblacion. Particularmente personanan cu tabata biba den sclavitud no tabatin libertad ni oportunidad pa documenta nan propio experiencia, expresa nan bos of defende nan derecho.
Awe, acceso na informacion ta wordo reconoce como un derecho fundamental y como un condicion esencial pa educacion, transparencia, participacion ciudadano y un sociedad democratico. Documentonan cu antes tabata inaccesibel of poni exclusivamente den archivo y coleccion special por awendia wordo conserva, investiga, digitalisa y comparti cu un publico mucho mas amplio.
E contraste entre antes y awor ta mustra importancia di conserva memoria documental. Unda hopi bos no a wordo registra of tende den pasado, awendia nos tin e responsabilidad colectivo di busca, interpreta y comparti nan historia. Acceso na e documentonan aki ta permiti comunidad conoce su pasado, verifica informacion, reflexiona riba inhusticianan historico y compronde con nan a influencia identidad y desaroyo di Aruba.
“Letra y Consenshi” ta presenta documento y relato relaciona cu sclavitud y emancipacion na Aruba. Pa medio di fuente historico, e exposicion ta duna visibilidad na experiencianan humano cu ta forma parti di nos memoria colectivo. Asina, palabra skirbi ta bira no solamente evidencia di pasado, sino tambe un instrumento pa integridad historico, reconocemento, dialogo y consciencia.
Cooperacion entre Comite Nacional Memory of the World Aruba, UNESCO Aruba, Biblioteca Nacional Aruba, Archivo Nacional Aruba, Fundacion Amigonan di Archivo (ADA), Coleccion Aruba, Herdenkingscomite Slavernijverleden, y Post Aruba N.V. ta fortalece preservacion, investigacion y transmision di informacion confiabel na actual y futuro generacionnan.
E institucionnan envolvi ta extende un invitacion cordial na henter comunidad pa asisti na e actividad y bishita e exposicion “Letra y Consenshi: Balor Humano di un Pueblo” na Post Aruba N.V. cuminsando dialuna awor 28 di September.
Bin descubri con palabra, documento y memoria ta yuda nos compronde pasado, proteha integridad di informacion y construi futuro cu mas conocemento y consciencia.
