Mientras cu sector di salud publico na Aruba ta enfrenta recorte presupuestario y cu e departamentonan di salud mental y adiccion ta clamando pa mas recurso humano y financiero local, un documento oficial di e Ministerio di Salud Publico (MB di dia 15 di september 2026) a saca na cla un gasto cu ta lanta hopi cuestionamento riba e maneho di fondo publico y transparencia di e actual administracion.
E Ministerio a autorisa un deal directo di un consultant hulandes, Koen Aanen, pa un tarifa exorbitante di 270 florin pa hora (Afl. 270,- bruto pa hora), pa un periodo di mas di 8 luna. En total, e contracto ta enbolbi un suma maximo di 194.400 florin di pueblo, financia pa Bureau di e Minister y e Directie Volksgezondheid Mervin Wyatt Ras
Trapando riba e Ley di Anuncio Publico (Aanbestedingsverordening)
E aspecto mas critico di e decision aki ta e forma cu e gobierno a haci uzo di uitzonderingsclausules pa evita un destaho publico (onderhandse aanbesteding). E mesun decreto ministerial ta reconoce cu pa mester di sumanan entre 25 mil y 200 mil florin, ley di Aanbestedingsverordening (Artikel 11) ta exigi pa haci un destaho.
Sin embargo, a aplica e clausula di excepcion di Artikel 16, lid 1 sub b, alegando cu e e experto aki tin “conocemento specifico cu no ta existi ni ta disponibel actualmente na Aruba” y cu “confiansa ta hunga un rol determinante” den e relacion laboral.
E argumento aki ta lanta dudanan profundo den e comunidad profesional local:
Falta di oportunidad pa talento local: Berdad no tin profesionalnan local capacita den e area di innovacion den salud publico o digitalisacion cu por a haya e oportunidad pa presenta un oferta?
Transparencia debilita: Laga un destaho pa afo argumentando “confiansa personal” ta habri e porta pa favoritismo y contratacion direct pa amigonan o conocirnan di e ministerio, sin e controlnan debito di e integridade di gastonan publico.
270 Florin pa Hora: Desconecta cu e tealidad di Aruba
Mientrastanto cu un trahado promedio na Aruba ta bringa pa cubri e costo di bida y cu e personal di salud existente den e e red di cuido (manera Respaldo o FADA) ta traha bou di presion y cu salarionan limita, e gobierno ta paga un tarifa di 270 florin pa hora pa maximo 20 hora pa siman.
Maske e meta pa “fortifica y digitalisa e cuido di adiccion y salud mental” ta un necesidad, e pregunta crucial ta keda: E gasto aki lo traduci berdaderamente den mehoracion tangibel pa e pacientenan cu ta sufri riba nos isla, o e lo keda un simpel plan di papel mas, financia cu miles di florin di impuesto di pueblo di Aruba?
Mas tristo ta cu e Hulandes aki no conoce un patarata di Aruba y pe traha su conseho, e mester bay acudo na tur instancia na Aruba, haci un entrevista, pa djey e skirbi un rapport.
E documento entrega pa e minister na Parlamento durante e reunion di comision OV#20 di dia 22 di september 2026 ta expone e mal maneho di Gobierno di Aruba.
