Loke un aña pasa a cuminsa como un iniciativa pa crea mas oportunidad pa comerciantenan, productor y artesanonan local, awe a crece pa bira un mercado mensual cu ta reuni mas di 60 vendor den centro di San Nicolas. E diasabra aki, 26 di september, lo celebra e prome aniversario di San Nicolas Pop-Up Market, di 9or di mainta te 2or di atardi na Plaza Lolita.
San Nicolas Pop-Up Market a inicia na september 2025 cu 13 vendors y artesanonan local despues cu un grupo di vendors a acerca Ministerio di Finansa, Asunto Economico y Sector Primario pa sosten. Despues di a organisa e mercado pa algun tempo riba un scala chikito, e deseo tabata pa haci esaki mas grandi. Den e lunanan cu a sigui, cu ayudo di e ministerio y e District Advisor pa San Nicolaas, sr. Rondel Heyliger, a traha duro pa e participacion crece constantemente, pasando 40 vendors y artesanonan na november y eventualmente mas di 60 comerciante, productor y artesano local participando den e mercado. E crecimiento aki a transforma e Pop-Up Market den un actividad mensual cu ta atrae residente y bishitante for di diferente parti di Aruba pa e centro di San Nicolas.
For di inicio, iniciativa di Minister di Finansa, Asunto Economico y Sector Primario, Geoffrey Wever, tabata pa Gobierno no solamente organisa un evento, sino inverti cada luna den un plataforma accesibel unda negoshinan chikito por presenta y bende nan producto, amplia nan clientela y genera entrada, tur esaki mientras ta trece fluho di e hende den centro di San Nicolas.
Pa e motibo ey, Minister Wever a sigui inverti den organisacion di e Pop-Up Market cada luna, creando e condicionnan pa comerciantenan local por concentra riba loke nan ta haci mihor cual ta produci, crea y bende.
E concepto ta reuni diferente parti di economia local den un solo espacio. Na Plaza Lolita bishitantenan por encontra artesania y obra di man, producto di agricultornan local, cuminda, bebida, producto local y diferente otro producto ofreci directamente pa comerciantenan y productornan local. E mercado ta combina esaki cu musica y un ambiente familiar y cultural caracteristico di San Nicolas.
Minister Wever a indica cu e meta ta pa crea oportunidad economico cu por crece y sostene su mes.
“Un aña pasa nos a cuminsa cu 13 vendor y cu un vision: crea un espacio unda nos comerciantenan y productornan local por haya oportunidad pa bende, crece y conecta directamente cu consumidor. Awe despues di 1 aña nos ta mira mas di 60 vendor y un comunidad cu cada luna ta sostene e iniciativa. Esey ta exactamente e tipo di actividad economico cu nos kier stimula den centro di San Nicolas,” Minister Wever a express.
E impacto di e Pop-Up Market ta bay mas leu cu e actividad di un solo diasabra. Cada edicion ta trece un fluho di hende den centro di San Nicolas, crea mas exposicion pa producto local y ta duna negoshinan chikito oportunidad pa genera un clientela y haci conexion nobo.
Na november 2025, e mercado ya tabata conta cu mas di 45 vendor, mientras cu pa mei 2026 publicacionnan a reporta casi 70 vendor activo y mas di 30 otro interesa na participa. Actualmente tin un lista di espera di mas di 50 vendors y artesanonan y pa e motibo aki Minister Wever tin plan pa amplia e mercado aun mas.
Pa Minister Wever, e desaroyo aki ta parti di un vision mas amplio cu ta pa crea un comunidad comercial activo den centro di San Nicolas, unda actividad economico, cultura y comunidad por fortalece otro.
“Revitalisacion no ta solamente renoba edificio of espacio publico. Mester crea motibo pa hende bolbe, keda, consumi y haci negoshi den centro di San Nicolas. Cada luna cu Plaza Lolita ta yena cu comerciantenan y bishitantenan, nos ta crea mas actividad economico y ta sigui traha riba e confianza den potencial di San Nicolas,” Minister Wever a indica.
E Pop-Up Market tambe ta conecta cu e vision pa un mercado permanente como parti di revitalisacion di San Nicolas. Desde su inicio, e iniciativa mensual a wordo presenta como un manera pa crea actividad y oportunidad mientras e desaroyo mas amplio di e area ta continua.
E prome aniversario ta un momento pa celebra no solamente crecemento di e mercado, sino principalmente tur e comerciantenan, productor, artesano y bishitante cu durante e ultimo aña a duna bida na e concepto.
Ministerio di Finansa, Asunto Economico y Sector Primario ta gradici cada vendor cu a kere den e iniciativa desde su inicio, e comunidad di San Nicolas y tur persona cu cada luna ta yega pa sostene producto y negoshi local.
Minister Geoffrey Wever ta invita henter pueblo di Aruba pa yega e diasabra aki, 26 di september, na Plaza Lolita y celebra hunto e prome aniversario di San Nicolas Pop-Up Market.
📅 Diasabra 26 di september
🕘 9:00 AM – 2:00 PM
📍 Plaza Lolita, San Nicolas
Bin celebra un aña di comercio local, oportunidad y comunidad. Bin sostene nos comerciantenan y productornan local y forma parti di e movemento cu ta sigui trece mas actividad economico y bida den centro di San Nicolas.
