E diadomingo aki, 27 di september, Savaneta lo bolbe bira punto central di pesca, gastronomia, cultura y comunidad durante e segundo edicion di Savaneta Seafood Festival. Despues di e prome edicion exitoso na 2025, Savaaneta Prome Capital ta trece e festival un biaha mas cu e meta di sigui ofrece un plataforma na nos piscadonan, productornan y empresarionan local, mientras ta pone e tradicion di pesca di Savaneta den centro di desaroyo di sector primario.
Fundacion Savaneta Prome Capital ta organisa e festival unico aki den colaboracion cu Ministerio di Finansa, Asunto Economico y Sector Primario y diferente partnernan publico y priva. E iniciativa a nace cu un vision pa celebra e herencia di pesca di Savaneta, crea actividad economico den comunidad y sigui posiciona Savaneta como e capital di pesca di Aruba.
E diadomingo aki publico por disfruta di un variedad di pisca y seafood, preparacion culinario, musica live, entretenemento, artesania y diferente actividad den un ambiente familiar. Pero tras di e celebracion tin un meta mas amplio, cual ta pa conecta piscamento local cu gastronomia, emprendemento, cultura y actividad economico, pa asina crea mas oportunidad rond di un sector cu ta forma parti di identidad di Aruba.
Pa Minister Geoffrey Wever, Savaneta Seafood Festival no ta un iniciativa aisla. E ta conecta cu diferente accion cu ta wordo implementa pa fortalece e fundeshi necesario pa sector primario por desaroya y crea mas oportunidad economico.
Den sector di pesca, Gobierno a inverti den renobacion di pier di ex-Brisas del Mar na Savaneta, un infrastructura importante pa piscadonan y comunidad. E maneho tambe ta inclui inversion den otro piernan usa pa actividad di pesca, cu e meta di ofrece infrastructura mas adecuado pa e sector.
Na mes momento, cu Programa Piskechi, Gobierno ta inverti den e siguiente generacion. Muchanan y hobennan entre 10 y 17 a haya oportunidad pa siña tecnica tradicional di piscamento y adkeri conocemento practico, cu e meta di conserva conocemento local y stimula interes den pesca como parti di futuro di sector primario.
Minister Geoffrey Wever, ta indica cu e diferente iniciativanan ta forma parti di un mesun direccion di maneho.
“Si nos kier fortalece sector primario, nos mester atende diferente parti di e cadena. Nos mester infrastructura pa nos piscadonan, conocemento pa e siguiente generacion, oportunidad pa empresario y un mercado unda producto local por haya mas visibilidad. Savaneta Seafood Festival ta reuni varios di e elementonan aki den un solo lugar, nos piscadonan, nos producto, nos cultura, nos empresarionan y nos comunidad.”
E vision pa sector primario ta enfoca riba crea condicionnan pa produccion local por crece y pa mas actividad economico por desaroya rond di agricultura, pesca y produccion local. Esaki ta conecta cu e meta mas amplio di diversifica economia, stimula iniciativa empresarial y contribui na un suministro di alimento mas resiliente pa Aruba.
Den agricultura, por ehempel, e AGRIFUND di Afl. 3 miyon a crea acceso na financiamento pa productor- y agricultornan pa inverti den nan actividad comercial. Den pesca, inversion den infrastructura, formacion di hobennan y promocion di producto local ta forma otro parti di e mesun direccion, cual ta pa crea un sector primario cu tin mas capacidad pa produci, desaroya y genera actividad economico.
E prome Savaneta Seafood Festival na 2025 a wordo inicia cu e intencion pa bira un evento anual. Cu e segunda edicion, e iniciativa ta continua construyendo riba e fundeshi ey.
E meta ta pa Savaneta Seafood Festival sigui crece como un plataforma unda piscadonan, comerciante, emprendedornan, gastronomia y cultura local por bini hunto. Asina, e balor di pesca local no ta termina ora pisca yega tera, sino por sigui genera actividad economico den preparacion di cuminda, benta, gastronomia, comercio y experencia cultural.
“Nos kier mira un sector primario cu ta crea oportunidad. Un sector cu no solamente ta conserva nos tradicion, pero cu tambe ta innova, genera entrada y ta ofrece perspectiva pa un siguiente generacion. Pa Savaneta, pesca ta parti di su historia, pero e por forma parti importante tambe di su futuro economico,” Minister Wever a expresa.
E segundo edicion di Savaneta Seafood Festival ta un otro momento pa pone producto local den centro y pa mustra e potencial cu tin ora gobierno, comunidad, piscadonan y empresarionan traha den un mesun direccion.
Minister Geoffrey Wever ta invita henter comunidad di Aruba y nos bishitantenan pa yega Savaneta e diadomingo aki, 27 di september entre 11’or di mainat te 7’or di anochi, pa disfruta di e ambiente y conoce mas di cerca e producto, cultura y tradicion di pesca cu Savaneta tin di ofrece.
E diadomingo aki, Savaneta ta celebra su pesca, su cultura y su comunidad.
