Parlamentario Jennifer Arends-Reyes ta felicita Bureau Traimerdia cu su 30 aña di servicio na muchanan y famianan di Aruba. Durante tres decada, Traimerdia a ofrece muchanan un luga sigur despues di scol, caminda nan por haci tarea, hunga, move y descubri nan talento. E aniversario ta un oportunidad pa reconoce tur e trahadornan cu, durante añanan, a contribui cu dedicacion na e programa.
Pa Arends-Reyes, e celebracion ta invita nos tambe pa wak dilanti: ki oportunidadnan tin pa hobennan cu ta atende enseñansa secundario ora scol caba? E necesidad di guia y sosten no ta termina ora un mucha pasa di scol basico pa secundario. Den e etapa ey, un hoben por beneficia di yudansa cu tarea, deporte, cultura y un ambiente positivo caminda e por desaroya su interesnan y pasa su tempo di un manera constructivo.
“Mi a papia hopi aña tocante importancia di programanan despues di scol. Pa mi, esaki ta un di e yabinan pa duna nos muchanan y hobennan mas oportunidad. Si nos kier yuda nan crece cu confianza y prepara nan pa futuro, nos mester sa tambe con nos ta sostene nan despues cu e bel di scol zona,” Arends-Reyes a expresa.
E parlamentario a dirigi preguntanan na minister competente pa haya claridad riba e programanan despues di scol cu actualmente ta disponibel pa hobennan den enseñansa secundario. E ta pidi informacion tocante na cua scolnan of den cua barionan e programanan ta funciona, cuanto hoben ta participa y con nan ta bayendo.
Arends-Reyes kier sa tambe si tin investigacion of evaluacion cu ta mustra cua scolnan tin mas necesidad di un oferta asina, cua grupo di hoben ainda no ta wordo cubri y ki obstaculo ta existi pa amplia e oportunidadnan. Segun e parlamentario, e contestanan aki ta necesario pa por desaroya un plan basa riba e necesidadnan real di scolnan, famianan y hobennan mes.
“Nos por felicita Traimerdia pa su 30 aña di servicio y, na mes momento, wak dilanti. Mi deseo ta pa mas hoben di Aruba haya un luga caminda nan por siña, descubri nan talento y sinti cu nan tin sosten. E topico aki semper a importa pa mi y e ta keda importante pa desaroyo di Aruba,” Arends-Reyes a conclui.
