Parlamentario Endy Croes fraccion MEP: 𝗚𝗲𝗼𝗳𝗳𝗿𝗲𝘆 𝗪𝗲𝘃𝗲𝗿 𝗮 𝗽𝗿𝗲𝘀𝗲𝗻𝘁𝗮 𝗻𝗮 𝗣𝗮𝗿𝗹𝗮𝗺𝗲𝗻𝘁𝗼 𝗮𝗹𝗴𝗼 𝗱𝗶𝗳𝗲𝗿𝗲𝗻𝘁𝗲 𝗱𝗶 𝗹𝗼𝗸𝗲 𝘀𝘂 𝗽𝗿𝗼𝗽𝗶𝗼 𝗱𝗲𝗽𝗮𝗿𝘁𝗮𝗺𝗲𝗻𝘁𝗼 𝗵𝘂𝗿𝗶𝗱𝗶𝗰𝗼 𝗱𝗶 𝗴𝗼𝗯𝗶𝗲𝗿𝗻𝗼 𝗮 𝗰𝗼𝗻𝘀𝗲𝗵𝗮 

E ley di LNT ta den centro di un debate serio riba transparencia y bon gobernacion 

Diamars mainta, Minister Geoffrey Wever a atende un reunion publico den Parlamento pa pidi e sentimento di Parlamento riba un carta cu el a manda, proponiendo varios cambio den e ley di Landsverordening Normering Topinkomens (LNT). Esaki ta e ley cu ta pone un dak (maximum) riba salarionan excesivo den sector publico y semi-publico.

E debate no a yega te na su final. Memey di e discusion, Fraccion di Futuro a pidi schorsing di e reunion. Pa Parlamentario Endy Croes, e timing no ta coincidencia: e schorsing a yega exactamente na e momento cu e preguntanan tabata bira demasiado incomodo pa Minister Wever.

𝗞𝗶𝗰𝗼 𝗲 𝗹𝗲𝘆 𝗱𝗶 𝗟𝗡𝗧 𝘁𝗮?

E LNT ta un ley cu Hulanda a impone riba Aruba como condicion pa e prestamonan di likides cu Aruba a ricibi durante COVID-19. E meta ta simpel: ningun director di un NV di gobierno, entidad gubernamental of fundacion cu gobierno ta nombra su directiva, no por gana mas cu 130% di e salario di un Minister-President. Door di un indexacion di 11.7%, e maximo actual a subi di 329.000 pa 369.000 florin pa aña. Aruba, Corsou y Sint Maarten tur mester implementa e ley aki hunto.

𝗘 𝗲𝘅𝗰𝗲𝗽𝗰𝗶𝗼𝗻 𝗱𝗶 𝗮𝗲𝗿𝗼𝗽𝘂𝗲𝗿𝘁𝗼 𝗰𝘂 𝗮 𝗸𝗲𝗱𝗮 𝘀𝗰𝗼𝗻𝗱𝗶

Na november 2025, despues di un peticion di Schiphol, Minister Geoffrey Wever a uza articulo 12 di e ley pa duna un Hulandes, esta e Director di Aruba Airport Authority un excepcion salarial di casi 1.6 miyon florin pa aña. Esaki ta mas cu cuatro biaha e maximo legal. E minister a haci esaki sin a acerca Parlamento previamente pa pidi opinion. E mes patronchi cu nos a mira cu e Rijkswet HOFA: decision di gran peso tumando luga sin consulta cu Parlamento.

Den Parlamento, e minister a duna di conoce cu el a actua asina despues cu Minister Mike Eman y Minister Wendrick Cicilia a pidi cooperacion cu Hulanda den Conseho di Minister. Sinembargo, ta notabel cu di tur e peticionnan pendiente, ta esun di e Hulandesnan so el a atende di biaha.

𝗟𝗼𝗸𝗲 𝗲 𝗽𝗿𝗼𝗽𝗶𝗼 𝗱𝗲𝗽𝗮𝗿𝘁𝗮𝗺𝗲𝗻𝘁𝗼 𝗵𝘂𝗿𝗶𝗱𝗶𝗰𝗼 𝗱𝗶 𝗴𝗼𝗯𝗶𝗲𝗿𝗻𝗼 𝗮 𝗰𝗼𝗻𝘀𝗲𝗵𝗮 𝘃𝘀. 𝗹𝗼𝗸𝗲 𝗲 𝗺𝗶𝗻𝗶𝘀𝘁𝗲𝗿 𝗮 𝗽𝗿𝗲𝘀𝗲𝗻𝘁𝗮

Esaki ta e curason di e full e asunto. Minister Geoffrey Wever a presenta na Parlamento un conseho di e departamento huridico di gobierno, data di 27 di februari 2026. E minister a afirma cu e mes departamento a conseh’e pa bay pidi “gevoelens” na Parlamento y pa uza “begunstigend beleid” pa atende peticionnan pendiente cu faboritismo.

Fraccion di MEP a lesa e conseho original. E conseho ta bisa algo completamente diferente:

“Vooruitlopend op deze evaluatie en op de mogelijke uitkomsten van de lopende LNT rechtzaken adviseer ik voorts om de LNT overeenkomstig mijn antwoorden op uw vragen te wijzigen.” — Conseho oficial di departamento huridico di gobierno, 27 februari 2026

E departamento huridico di gobierno a conseha e minister pa cambia e ley prome. No pa bay pidi “gevoelens” pa despues traha cu faboritismo. Esaki ta dos instruccion completamente diferente.

Banda di esaki, Fraccion di MEP a confronta e minister riba un segundo punto: e evaluacion cu supuestamente a tuma luga. Ora a puntra Minister Wever si el a evalua e ley, su contesta tabata afirmativo. Pero nunca el a instala e comision di expert cu e departamento huridico di gobierno a conseh’e pa forma.

Ora Fraccion di MEP a confronta e minister cu e diferencia entre loke departamento huridico di gobierno a skirbi y loke el a presenta na Parlamento, e reunion a wordo geschorst.

Parlamentario Endy Croes ta laga pueblo di Aruba saca su mes conclusion. Nos ta papia aki di un minister cu ta presenta na Parlamento algo diferente di loke e propio departamento huridico di gobierno a conseha. Cu ta laga para un reunion publico ora e preguntanan ta bira incomodo. Un minister cu ta sigui e mesun patronchi di keda sin consulta cu Parlamento. E mesun cu nos a mira cu HOFA y na e excepcion di director di aeropuerto. 𝗘𝘀𝗮𝗸𝗶 𝘁𝗮 𝗲 𝗺𝗶𝗻𝗶𝘀𝘁𝗲𝗿 𝗰𝘂 𝗮𝗯𝗼 𝗸𝗶𝗲𝗿 𝗽𝗮 𝗺𝗮𝗻𝗲𝗵𝗮 𝗯𝗼 𝗽𝗹𝗮𝗰𝗮? 𝗠𝗶𝗻𝗶𝘀𝘁𝗲𝗿, 𝗽𝘂𝗲𝗯𝗹𝗼 𝘁𝗮 𝗺𝗶𝗿𝗮 𝘆 𝗽𝘂𝗲𝗯𝗹𝗼 𝗺𝗲𝗿𝗲𝗰𝗲 𝗺𝗶𝗵𝗼.