Aruba, Boneiro y Corsou tabata bon representa durante e Talen en Cultuurdag, cu a tuma luga diasabra 26 di september na Universiteit Leiden na Hulanda.
Durante e actividad, e tres islanan ABC a uni pa presenta y promove Papiamento y Papiamentu. Tres persona cu ta papia e idioma a atende e evento y a duna bishitantenan mas informacion tocante e diferencianan cu tin den e manera cu e idioma ta wordo papia y skirbi na e islanan.
Tambe a splica con, a traves di añanan, Papiamento y Papiamentu a incorpora diferente palabra proveniente di otro idioma, algo cu ta forma parti di e riqueza linguistico y cultural di nos islanan.
Entre esnan presente tabatin autora Liberta Rosario, Zuleika Coffie y, como representante temporal di Simia Literario, Corrie Maduro. Nan a atende e personanan cu tabata interesa pa conoce mas tocante e idioma y cultura di Aruba, Boneiro y Corsou. Bishitantenan a haya hasta oportunidad pa siña algun palabra y expresion na Papiamento/Papiamentu “on the spot”.
Como parti di e presentacion, a lesa tambe un fragmento di e buki “Maternity”. Pa motibo cu e publicacion ta cuatrilingue, bishitantenan por a compara facilmente e texto den diferente idioma.
Participacion di Aruba, Boneiro y Corsou durante e Talen en Cultuurdag a brinda un oportunidad pa pone e idioma y literatura di nos islanan den centro di atencion y, na mes momento, comparti cu publico na Hulanda e riqueza y diversidad cultural cu ta caracteriza e islanan ABC.
