Fraccion di MEP a haci preguntanan na Minister-President pa haya claridad riba e reciente noticianan cu Aruba lo a nenga un autorisacion pa un vuelo baha na Aruba cu lo tabata transportando María Corina Machado, lider di oposicion di Venezuela y ganadora di e Premio Nobel pa Paz. Pa MEP, ta importante pa e pueblo di Aruba sa exactamente kico a pasa, ken a tuma e decision y riba cua base legal.
E fraccion a pidi, entre otro, confirmacion di si e peticion pa baha na Aruba a existi, si Aruba a nenga e permiso y, si esey ta e caso, cua tabata e motibo y cua instancia a tuma e decision.
MEP a pidi tambe claridad riba si tabatin contacto of consulta cu Venezuela, Hulanda, Merca of otro pais, y si algun presion diplomatico of politico a hunga un rol.
Transparencia, responsabilidad y respet pa e estado di derecho ta fundamental pa un democracia fuerte. Como oposicion, MEP lo sigui cu su tarea di control pa garantisa cu e pueblo di Aruba ta haya claridad riba decisionnan cu por tin impacto pa nos pais y nos posicion den e region.
Un democracia fuerte pa un Aruba prospero.
