Aruba Bank tin e placer di anuncia nombramento di Ramon Mas, actualmente Head of Corporate & Platinum Banking and KYC, como Managing Director, efectivo dia 1 di november 2026.
Ramon ta trece mas cu 25 aña di experiencia den sector bancario, cu conocemento y experiencia den Corporate Banking, Credit Risk, Personal Banking, asunto regulatorio y liderazgo ehecutivo. Desde cu el a drenta Aruba Bank na 2013, el a ocupa varios posicion clave y a hunga un papel importante den fortalecemento di e actividadnan di Corporate Banking di Banco, den salvaguardia calidad di su cartera di credito y den construccion di relacionnan duradero den comunidad empresarial di Aruba.
Prome cu e la cuminsa na Aruba Bank, Ramon a construi un carera bancario internacional na Spaña y Belgica, unda el a acumula experiencia den Corporate Banking, Credit Risk, Cash Management, Trade Finance y Relationship Management. El a traha cu clientenan corporativo mediano y multinacional y a lidera ekiponan enfoca riba actividadnan “cross-border”. E base internacional ey, combina cu mas cu un decada di experiencia den mercado di Aruba, ta dune un perspectiva cu ta tanto global como profundamente conecta cu Aruba.
“Aruba ta mi cas pa hopi aña caba, y e Banco aki y su clientenan ta forma un parti grandi di esey. Mi ta orguyoso di asumi e funcion aki y agradecido pa e confianza cu a wordo deposita den mi. Mi enfoke” lo ta riba un banco cu ta cerca di su clientenan, cu ta solido den su decisionnan y cu ta comprometi cu bienestar di Aruba riba termino largo,” Ramon Mas a bisa.
Como Managing Director, el lo traha hunto cu e otro miembronan di gerencia pa sigui construi riba e fundeshi di Aruba Bank, avansa su prioridadnan strategico y impulsa innovacion, cu atencion particular pa clientenan, empleadonan y desaroyo economico di Aruba.
E Supervisory Board y gerencia di Aruba Bank ta felicita Ramon cu su nombramento y ta dese’e hopi exito den su funcion como Managing Director di Aruba Bank.
