Departamento di Asuntonan Economico, Comercio y Industria (DEACI), mediante su unidad Iniciativa pa Desaroyo pa Empresa Arubano (IDEA), ta sigui inverti den desaroyo y fortalecemento di entrepeneurs na Aruba, door di ofrece workshopnan practico cu ta duna nan e conocemento y hermentnan necesario pa maneha nan negoshi cu mas confiansa y na un manera mas sostenibel.
Den cuadro di e esfuerso continuo aki, IDEA, den colaboracion cu Departamento di Impuesto (DIMP), ta organisa e workshop GRATIS di “Time for Taxes”. E workshop aki lo tuma lugar ariba diamars 6 di oktober 2026, di 9:00 pa 11:00 di mainta, na DEACI, situa den Cas Veneranda, na di dos piso.
E workshop ta dirigi na personanan cu ta pensa di habri un negoshi, esnan cu ta actualmente den proceso di establece nan negoshi, como tambe comerciante cu ya ta activo y cu kier comprende nan obligacionnan fiscal den un manera mas miho y transparente.
Comprendemento di impuesto y responsabilidad fiscal ta un aspecto importante di maneho di cualkier negoshi. Cu e workshop aki, participantenan ta haya informacion directamente for di representantenan di DIMP, cu lo trata entre otro: Impuesto riba Entrada y Ganashi (Inkomsten- y Winstbelasting), BBO, BAVP y BAZV, y BO Impuesto (BOi) portal, ademas di otro topiconan relevante pa comerciantenan.
Minister di Finansa, Asuntonan Economico y Sector Primario, Geoffrey Wever, ta enfatisa cu pa stimula e sector priva no ta suficiente solamente pa promove creacion di negoshi; ta igualmente importante pa comerciante haya acceso na e conocemento necesario pa por opera y sigui crece.
“Nos kier pa tur comerciante of comerciante potencial, tin e conocemento y hermentnan necesario pa construi un negoshi exitoso y sostenibel. Un comerciante cu ta bon informa ta den un posicion mihor pa tuma decisionnan, cumpli cu su responsabilidadnan y concentra riba crecemiento di su negoshi. Negoshinan cu ta logra crece y sostene nan mes ta contribui directamente na un economia mas fuerte y dinamico,” Minister Wever a expresa.
Minister Wever ta gradici y expresa su sosten na e teamnan di DEACI, IDEA y DIMP pa nan trabou duro, dedicacion, creatividad y cooperacion continuo pa realisa iniciativanan manera esaki.
“E colaboracion entre nos departamentonan ta esencial pa por sigui crea iniciativanan cu tin un impacto positivo y concreto den nos comunidad comercial. Mi ta aprecia profundamente e compromiso di e teamnan cu ta sigui busca manera creativo pa promove informacion, conocemento y hermentnan na nos comerciantenan, y asina contribui na nan desaroyo y exito.”
E workshop lo tuma lugar diamars 6 di oktober 2026, di 9:00 pa 11:00 di mainta, na DEACI, situa den Cas Veneranda, Wilhelminastraat #7, riba di dos piso.
Participacion ta completamente gratis, pero registracion ta obligatorio y cupo ta limita.
Interesadonan por registra via e formulario di Time for Taxes, via Facebook di IDEA Aruba, of scan e QR-code publica den e anuncio oficial.
