Parlamentario di AVP, John Hart, a lamenta cu e reunion cu Minister di Enseñansa y Hubentud, Gerlien Croes, no por a continua. Su intencion tabata pa pone delincuencia hubenil den centro di atencion di parlamento y habri caminda pa un acercamento integral, cu participacion di enseñansa, asuntonan social y husticia.
Hart ta enfatisa cu e problemanan cu un hoben ta enfrenta hopi biaha ta cuminsa na cas y na scol, prome cu e yega den contacto cu polis. P’esey, e considera cu prevencion y intervencion no por keda limita na Ministerio di Husticia. Mester tin cooperacion entre e ministerionan pa identifica e causanan y ofrece guia y sosten na tempo.
Hart a recorda cu e necesidad di un acercamento comparti tabata parti di su anuncio previo tocante e reunion. Su meta tabata pa parlamento por discuti con e diferente ministerionan por traha hunto riba solucionnan pa delincuencia hubenil y e circunstancianan cu ta contribui na dje. Ta lamenta cu oposicion a boycotia e meta aki.
Ora Minister Gerlien Croes a drenta sala, miembronan di oposicion a cuminsa grita y interumpi Presidente di Parlamento, Marlon Sneek, sin dun’e oportunidad pa termina su splicacion. Hart a critica tambe loke el a describi como uzo di palabranan ofensivo contra coleganan. Den su opinion, e comportacion aki ta duna un mal ehempel den e institucion cu mester promove respet y dialogo.
E parlamentario a sostene cu oposicion a desvia e atencion di delincuencia hubenil pa e reunion solicita tocante e vuelo cu jet priva. Segun Hart, Sneek a splica cu e proceso pa obtene informacion tocante e asunto ey ainda tabata andando y cu, pa e motibo aki, e reunion no por a wordo convoca ainda.
Hart ta acusa MEP di aplica loke e ta yama “smokescreen politics”: desvia atencion di otro asuntonan cu, segun e, tambe ta exigi claridad y dunament’i di cuenta. Caso Kwihi, por ehempel, ta relaciona cu sospecho di uzo indebido di fondo publico, estafa, labamento di placa, fraude di belasting y maluzo di funcion, presuntamente cometi entre november 2017 y october 2021, durante e periodo di Gabinete Wever-Croes.
Pa Hart, e diferencianan politico no mester stroba parlamento di atende e preocupacionnan di comunidad tocante delincuencia hubenil. El a reitera e importancia di bolbe tuma e debate cu seriedad y cu participacion di e ministerionan concerni, pa avanza cu un strategia integral di prevencion, guia y intervencion.
Fraccion di AVP ta sostene cu e bienestar y futuro di nos hobennan merece atencion continuo, cooperacion y accion concreto.
