Den cuadro di e publicacion tocante presupuesto Algemeen Investerings- en Ontwikkelingsfonds 2026 – 2027 (AIOF 2026–2027), a wordo anuncia inversionnan destina, entre otro, pa mehoracion di infrastructura, facilidadnan di enseñansa, renobacion di bario, fortalecemento di servicio di Gobierno, renobacion di facilidadnan publico y stimulacion di desaroyo sostenibel di Aruba. Cada uno di e inversionnan aki por contribui na un pais mas fuerte, sigur y comunidad digno. Sinembargo den e desaroyo importante aki, ta esencial pa Cuido di Adulto Mayor tambe haya e atencion cu e merece.
Adulto Mayor a contribui durante hopi aña na formacion di nos comunidad. Ora nan bira dependiente di sosten y cuido, nan mester por conta riba un ambiente adapta na nan necesidadnan di cuido. P’esey mes nos ta urgi atencion pa inclui Cuido di Adulto Mayor como un prioridad strategico den planificacion di inversion publico. Calidad di cuido no ta depende solamente di legislacion y norma, sino tambe di infrastructura adecuado, material necesario, suficiente capacidad y continuidad den financiamiento.
Actualmente, e sector ta enfrenta necesidadnan concreto relaciona cu mantencion, renobacion di facilidadnan y disponibilidad di material pa duna cuido di calidad di berdad. Tras di cada cama tin un hende cu mester di atencion, seguridad y trato cu respet. Segun e datonan disponibel den e sector, casnan di cuido priva ta maneha alrededor di 300 cama, mientras cu SABA ta maneha alrededor di 200 cama. E capacidad aki ta ilustra e rol esencial cu SABA y e casnan di cuido priva tin den Cuido di Adulto Mayor na Aruba.
Inversion den Cuido di Adulto Mayor no por wordo posponi mientras ta warda riba adaptacion di legislacion. Cada retraso ta afecta e condicionnan diario den cual Adulto Mayor ta ricibi cuido y den cual cuidadornan ta cumpli cu nan responsabilidad. Medidanan preparatorio y inversionnan dirigi por cuminsa paralel, basa riba un evaluacion transparente di necesidadnan, prioridadnan y costo. Esaki por inclui mantencion urgente, mehoracion di infrastructura, adquisicion di material y fortalecemento di cooperacion cu proveedornan di cuido. E disponibilidad y aplicacion responsabel di recurso financiero ta, por lo tanto, un parti esencial di e discusion.
Den e contexto aki, recientemente Gobierno di Aruba a formalisa un areglo di deposito cu Sociale Verzekeringsbank (SVb) pa un suma di Afl. 50 miyon, cu un duracion di 36 luna y un interes di 3% pa aña. Conforme e informacion publico, e recurso ta destina pa refinanciamento y reduccion di costo di debe di Pais Aruba, y no pa gasto nobo. E precedente financiero aki ta halsa un pregunta legitimo: si por mobilisa recurso disponibel pa refinancia debe, por evalua tambe un opcion legal y financieramente responsabel, pa inverti den Cuido di Adulto Mayor?
Un inversion asina ta toca directamente calidad di bida y condicionnan di cuido. Cualke opcion mester proteha obligacionnan di SVb, basa riba un analisis di riesgo y necesidad, y conta cu transparencia, supervision y garantia cla pa pago bek.
Mi ta haci un yamada na Gobierno y Parlamento pa inclui Cuido di Adulto Mayor explicitamente den e prioridadnan di inversion y pa restart, den un termino cortico, un dialogo structura cu e dunador di cuido, expertonan financiero y otro partnernan relevante manera haci durante di e Foro Nacional pa Adulto Mayor.
E dialogo aki mester conduci na un inventario comparti di e necesidadnan mas urgente, un evaluacion di opcionnan financiero legal y sostenibel, y un plan di accion cu metanan, responsabilidadnan, presupuesto y plazonan cla.
Cuido di Adulto Mayor ta un responsabilidad comparti cu ta exigi compromiso y continuidad.
E preocupacionnan relaciona cu Cuido di Adulto Mayor no ta algo nobo. Durante e ultimo añanan, cu participacion di diferente stakeholders, a traha hunto pa desaroya un maneho y vision pa futuro di e sector, cual a wordo traspasa na Gobierno actual.
E trabou aki a inclui documentonan importante manera Deltaplan 2023-2033, Waarborging van levenskwaliteit voor ouderen op Aruba (2024) y AAG Adviesrapport Inrichting Verpleging & Verzorging op Aruba (2025).
E documentonan aki ta forma un base importante pa sigui traha riba solucionnan structural. Mescos cu Gobierno a duna continuidad na e proyecto di Pasadia, ta importante pa mantene e atencion riba e otro necesidadnan di Cuido di Adulto Mayor.
P’esey, mi ta haci un yamada pa Gobierno y Parlamento di Aruba indica e siguiente pasonan, e tempo di implementacion, cu rendicion di cuenta transparente tocante progreso y resultado. Mi persona ta disponibel pa contribui activamente na e proceso, comparti experiencia di e sector y coopera na solucionnan realistico, sostenibel y duradero.
Nos no mester perde e progreso cu ya a wordo logra, ni permiti cu nos adultonan mayor bolbe keda atras. E momento awor ta pa traduci e vision comparti aki den accion concreto cu ta garantiza calidad y continuidad di cuido pa nos Adulotonan Mayor.
