Tira un bista rond y wak comportacion di hende, con hende ta biba, tur cos nan kier, y tur cos nan ta haci, no ta importa con nan haci, basta nan logra locual nan kier.
Hende no ta wak boluntad di Dios, nan ta lubida locual ta para scirbi den e Oracion di Nos Tata cual ta bisa: Cu Bo reino bini, cu bo boluntad sosode, na tera como na cielo.( Mateo 6:10).
Esey ta e yabi di biba pa Dios, ora nos ta tene cuenta cu su boluntad tanto aki na tera como na cielo.
Romanonan 12 ; 2 ta un advertencia pa tur hende bisando:Y no sea conforme e mundo aki, ma sea transforma pa medio di e renobamento di boso mente,pa boso por compronde kico ta e bon, y agradabel y perfecto boluntad di Dios.
Efecto di emocion ta haci danjo, pasobra pa motibo di emocion, hende ta lubida di pordona, hende ta cay den violencia, hende ta papia malo cu otro of di otro, hende ta falta respet, ofensa ta cay, y temor di Dios ta wordo lubida.
Laga nos wak bon con den Galationan 5:19-21 e obranan di carni ta mara na emocion, cu ta hiba hende na pica, y pica ta causa cu hende lo no hereda e reino di Dios.
Especialmente nos hubentud ta wordo domina pa emocion . Pa falta di conocemento di e palabra di Dios, y caminda tin emocion hopi hecho premedita ta tumando lugar, wak bon con ta wordo planea pa bay bringa, planea pa filma, planea pa corre auto duro, planea pa bay bebe y droga y hasta planea pa bay horta, tur esey ta hechonan emocional cu tin consecuencia grave.
Ora un hende ta yena cu rabia y emocion, y e tira un piedra den un bentana di glas, di ningun manera e no por yama e piedra bek, pasobra aunke e bisa sorry , ya e emocion a haci danjo caba.
Tin hopi decision cu ta wordo tuma emocional cu ta haci danjo grandi, por ehempel e tenemento di relacion sexual for di control, pasobra tin tres cos cu hende ta lubida cu por pasa, prome como hende muhe bo por sali na estado, y pa hende homber bo por bira tata sin ta prepara, bo por pega cu malesa, esey ta ambos banda, pero despues ta bini algo mas fuerte, bo por wordo contamina cu spirito malo, cual ta keda riba bo, y si bo no wordo libera, bo situacion lo bira pio.
Tur esey ta sosode pa motibo di emocion, pa falta di dominio propio, pa falta di respet pa bo mes, pa falta di control riba bo deseonan, bo por causa un danjo na bo mes y na otro.
Esun cu no tin dominio riba su spirito, ta manera un stad basha abao sin muraya.( Proverbionan 25:28).
No duna diabel oportunidad.( Efesionan 4;27).
No laga ningun palabra danino sali for di boso boca, sino solamente palabra cu ta bon pa edificacion, conforme e necesidad di e momento, pa esaki duna gracia na esnan cu ta tende. ( Efesionan 4:29).
Ta imposibel pa tur combersacion cu hende mester tin, palabra malo mester ta presenta, tene cuenta cu palabra malo ta rebaha esun cu ta papia, palabra malo.
Pasobra e ta demostra falta di respet pa bo mes, na prome lugar, pasobra e ta demostra falta di educacion.
Ta bon pa hende controla nan emocion, ta bon pa hende busca boluntad di Dios, den tur cos, pasobra cada biaha cu nos haci cos emocional e consecuencia ta bini pa nos.
Ban biba pa Cristo.
Sinceramente, Pastor Marcel Balootje
