E anotacionnan personal di Reina Beatrix tocante Betico Croes a habri heridanan profundo na Aruba. E famia di Betico no a pidi pa esaki. E pueblo di Aruba no a pidi pa esaki. Pero awor cu e palabranan aki a bira publico, nos tin tur derecho pa sa kico tabata kiermen cu nan. P’esey fraccion di MEP a haci preguntanan na gobierno di Reino, a traves di gobierno di Aruba, pa haya aclaracion.
Den e anotacionnan ta bisa: “Tijd winnen! Hij zal eens wegvallen. Dat afwachten.” Traduci na papiamento: “Gana tempo! Un dia e lo no t’ey mas. Warda riba esey.” Kico nan tabata kiermen cu “wegvallen” of “un dia e lo no tey mas”, di un persona di apenas 40 aña? Algo asina ta wordo bisa di un persona di edad halto, no di un persona hoben y salud. Ki informacion tabata den man di e gobierno Hulandes na e momento ey? Tabatin scenario, nota di maneho, plan of un draaiboek cu tabata tene cuenta cu e posibilidad cu Betico Croes lo no tey mas un dia, como factor politico, of talbes di otro forma?
“Nos no ta haci e preguntanan aki pa specula. Nos ta haci nan pasobra e historia di Aruba y e lucha di Betico Croes pa nos Status Aparte ta demasiado importante pa laga preguntanan di tal peso sin contesta. Na Aruba, y specialmente den MEP, nos tin desde hopi tempo e sentimento cu Hulanda a pone obstaculo pa Aruba y pa Betico Croes. E anotacion personal aki ainda no ta un confirmacion di esey. Pero e ta haci e preguntanan cu nos tin mas urgente. E ta exigi aclaracion” segun lider di MEP y subrina di Betico, Evelyn Wever-Croes.
Pueblo di Aruba tin derecho di sa kico tabata pasa y kico tabata conoci na e momento.
“Nos ta pidi e gobierno di Hulanda pa habri y investiga e archivo relevante, pa pone e documentonan disponibel y pa duna un contesta cla: kico tabata kiermen cu “wegvallen”? Y nos ta spera cu e gobierno di Aruba lo defende e derecho di nos pueblo y lo exigi e contestanan aki activamente. No ta trata di speculacion. No ta trata di acusacion. Ta trata di transparencia, claridad y berdad. Aruba tin derecho riba esaki”.
