Prome Minister di Aruba, Mike Eman, a continua su bishita oficial na Corsou cu diferente encuentro na nivel gubernamental, entre otro cu Gobernador interino di Corsou, Ruthsella Jansen, y Prome Minister Gilmar Pisas. Durante e encuentronan aki, e enfasis tabata riba e relacion entre e dos paisnan, e importancia di Reino Hulandes y e necesidad pa crecemento economico traduci den bienestar concreto pa ciudadanonan.
Durante su bishita na Fort Amsterdam, Prome Minister Eman a keda ricibi pa Gobernador Interino Ruthsella Jansen. Como gesto simbolico di amistad y e lasonan historico entre Aruba y Corsou, Eman a regalo e Gobernador interino un compas di palo, representando direccion, orientacion y e importancia di sigui fortalece e cooperacion entre e dos paisnan.
Na salida di e encuentro, Prome Minister Eman a expresa su satisfaccion cu e ricibimento cordial y e oportunidad pa intercambia pensamento tocante e desaroyonan actual den mundo y e retonan cu e paisnan di Caribe ta enfrenta.
Un di e temanan principal tabata e concepto di e bon comun, cu ta enfoca riba e importancia pa e crecemento economico di un pais no keda limita na e cifranan positivo, sino cu e prosperidad tambe mester refleha den e realidad socioeconomico di su ciudadanonan.
Eman a destaca cu tanto Aruba como otro e paisnan den region ta enfrenta e reto pa logra cu e beneficio di crecemento economico y actividad comercial yega na un parti mas amplio di comunidad. Den e contexto aki, el a menciona e trabou cu ta tumando luga na Aruba relaciona cu salario minimo, como un di e temanan importante den e esfuersonan pa mehora e bienestar di ciudadanonan.
E pensamento aki ta den liña cu e vision di bienestar comun, un concepto cu Prome Minister Eman ta promoviendo y cu tambe a forma parti di su declaracion na yegada na Corsou, caminda el a destaca cu e islanan di Caribe ta registra crecemento economico y e cifranan turistico positivo, pero cu e prosperidad no semper ta yega na tur sector di sociedad.
Otro tema importante durante e bishita tabata e balor di Reino Hulandes y e oportunidadnan pa fortalece e cooperacion entre e paisnan cu ta forma parti di dje.
Segun Prome Minister Eman, tanto durante e encuentro cu Gobernador interino Jansen como den su dialogo cu Prome Minister Gilmar Pik Pisas, nan a intercambia pensamiento y reflexiona riba con e paisnan por traha mas hunto, con Reino por contribui na e desaroyo di cada pais y con cada pais por aporta na e bienestar di otro.
Eman a enfatisa cu tin hopi oportunidad pa amplia e cooperacion entre Aruba y Corsou, no solamente riba tereno economico y comercial, sino tambe den e manera cu ambos pais por enfrenta e retonan social y economico cu nan tin en comun.
E bishitanan oficial ta forma parti di un bishita di Prome Minister Eman na Corsou, caminda e ta participa na Caribbean United in Excellence Summit, un conferencia regional cu ta reuni lidernan di diferente pais di Caribe y region pa dialoga tocante cooperacion, inversion, conectividad y desaroyo economico.
E conferencia ta coincidi cu e celebracion di Dia di Corsou, 10 di october, un fecha historico cu ta marca e posicion autonomo di Corsou como pais den Reino Hulandes.
Durante e siguiente dianan, Prome Minister Eman lo participa na diferente actividad oficial, incluyendo un panel di liderazgo regional hunto cu Prome Minister Gilmar Pisas di Corsou, Prome Minister Andrew Holness di Jamaica y Vicepresidente Gregory Rusland di Surinam.
Cu e encuentronan aki, e bishita di Prome Minister Eman na Corsou ta pone enfasis riba e importancia di dialogo, cooperacion y un vision comparti pa futuro di e islanan, caminda desaroyo economico y bienestar di comunidad ta bay man den man.
