Durante su discurso na Caribbean United in Excellence Summit na Corsou, Prome Minister di Aruba, Mike Eman, a haci un yamada na lidernan di e region Caribeño pa reflexiona riba nan modelonan economico y politico, cu e meta di garantisa cu crecemento economico y prosperidad ta traduci den un miho calidad di bida pa tur ciudadano.
E summit, organisa bou di liderazgo di Prome Minister di Corsou, Gilmar Pisas, ta reuni lidernan di diferente pais Caribeño pa dialoga tocante cooperacion regional, inversion, turismo, conectividad digital y oportunidad pa desaroyo economico. Entre e lidernan presente tabata Prome Minister di Jamaica, Andrew Holness, y Vice-president di Surinam, Gregory Rusland.
Durante su discurso, Prome Minister Eman a destaca cu, maske e paisnan Caribeño ta registra crecemento economico significativo, esaki no ta nifica automaticamente cu tur ciudadano ta beneficia di e prosperidad aki.
Crecemento economico di Aruba no ta refleha suficientemente den bienestar di pueblo
Pa ilustra su mensahe, Prome Minister Eman a comparti e experiencia di Aruba, caminda e economia a registra un crecemento considerabel durante e ultimo 15 aña. Segun e cifranan cu el a presenta, Producto Interno Bruto (PIB) di Aruba a aumenta di aproximadamente Afl. 4 biyon pa mas di Afl. 7 biyon. Na mes momento, e ingreso pa camber disponibel den sector turistico, conoci como Revenue per Available Room (RevPAR), a aumenta di USD 135 pa mas di USD 300 pa anochi.
Sinembargo, Prome Minister Eman a destaca cu e cifranan positivo aki no ta necesariamente refleha e realidad cu hopi famia Arubiano ta enfrenta diariamente. El a haci referencia na su bishitanan semanal den e barionan di Aruba, cu e ta realisa practicamente tur diahuebs, caminda e ta observa cu e prosperidad economico no ta yega na tur ciudadano den mesun proporcion. A pesar di e crecemento di turismo, inversionnan y desaroyo di construccion, ainda tin famianan y comunidadnan cu no ta sinti e beneficio di e progreso economico aki.
E realidad aki, segun Prome Minister, ta demonstra cu tin un desconexion entre e cifranan economico positivo y e bienestar real di pueblo. Den e contexto aki, Eman a invita su coleganan Caribeño pa haci un reflexion fundamental: pa ken e oportunidadnan ta ser crea, pa ken e crecemento economico ta tuma luga y ken realmente ta beneficia di e prosperidad?
Un yamada pa reconsidera e modelonan economico
Prome Minister Eman a enfatisa cu e region Caribeño tin potencial pa sigui amplia su economia, atrae mas turista, stimula inversionnan y desaroya sector economico nobo. Sinembargo, el a adverti cu si e crecemento aki no ta traduci den bienestar pa ciudadano, e paisnan lo ta perde un oportunidad importante pa logra e berdadero proposito di desaroyo. Segun Eman, ta necesario pa reconsidera e modelonan economico y e manera cu sociedad ta organisa, pa garantisa cu prosperidad no ta keda limita na un parti di e poblacion. Un di e ehempelnan cu el a menciona ta e esfuerso actual di Gobierno di Aruba pa aumenta salario minimo te na nivel di subsistencia. Eman a destaca cu e iniciativa aki ta enfrenta resistencia, pero cu ta importante pa reconoce cu e prosperidad di un pais ta resultado di e contribucion y trabou di tur su ciudadanonan. Pa e motibo aki, el a enfatisa necesidad di un compromiso colectivo pa garantisa cu progreso economico ta keda comparti y cu e beneficio di prosperidad ta yega na tur bario y tur hogar.
Bon comun “Common Good” como fundamento di cooperacion Caribeño
Un di e temanan central di e discurso di Prome Minister Eman tabata e concepto di e Bon Comun “Common Good”, cu segun Eman mester ocupa un posicion central den e cooperacion entre paisnan Caribeño. Eman a destaca cu cooperacion regional no mester limita su mes na inversion, comercio y conectividad, sino cu tambe mester conecta prosperidad economico cu bienestar social. Den su discurso, el a haci referencia na e importancia di dignidad humano, solidaridad y responsabilidad colectivo como e balornan fundamental pa un sociedad cu ta progresa. E concepto di bienestar comun, segun Prome Minister, ta bay mas leu cu interes individual of exito economico di un solo pais. E ta representa e responsabilidad comparti pa crea un miho futuro pa tur ciudadano.
Eman a relaciona e vision aki cu e literatura Caribeño, particularmente cu e novela Dubbelspel di escritor yiu di Corsou, Frank Martinus Arion. Den e novela, cuater homber ta reuni rond di un mesa di domino, pero nan diferencia, rivalidad y falta di confiansa ta conduci na un desenlace tragico. Prome Minister Eman a uza e historia aki como un metafora pa e relacion entre paisnan Caribeño, cu a pesar di nan diferencia y competencia economico, tin oportunidad pa scoge cooperacion y solidaridad como fundamento pa nan futuro.
Eman ta reconoce humanidad y solidaridad di Prome Minister Gilmar Pisas
Un di e momentonan mas personal di e discurso tabata ora cu Prome Minister Eman a expresa publicamente su aprecio pa Prome Minister Gilmar Pisas. Eman a comparti un experiencia di algun aña pasa, ora cu un amigo comun y miembro di Parlamento Melvin Tromp den feliz memoria a fayece na Aruba.
Segun Eman, Prome Minister Pisas a biaha pa Aruba pa acompaña nan durante e despedida di e amigo aki. Loke inicialmente tabata wordo considera como un bishita protocolario, a resulta den un gesto profundo di solidaridad. Pisas a acompaña nan durante e servicio religioso, posteriormente na cas di e famia, na cas di partido y finalmente durante e ultimo despedida.
Prome Minister Eman a destaca cu, a pesar di diferencia den ideologia politico, e gesto aki a demonstra e importancia di humanidad, respeto y solidaridad entre hende. El a expresa cu e balornan aki ta traspasa diferencia politico y ta forma parti di e fundamento moral necesario pa construi un sociedad cu ta ofrece un miho calidad di bida pa tur ciudadano. E experiencia aki, segun Eman, ta ilustra e significado di bienestar comun: e capacidad di mira necesidadnan di otro, compronde nan desafionan y actua cu solidaridad.
Competencia regional mester bay man den man cu cooperacion
Durante su discurso, Prome Minister Eman tambe a reflexiona riba e relacion historico entre Aruba y Corsou. El a recorda cu ambos isla a competi den pasado den industria petrolero, caminda cada uno a conta cu un di e refinerianan mas grandi di mundo. Awendia, ambos pais ta sigui competi den sector turistico, un industria cu ta representa un motor economico importante pa nan desaroyo.
Sinembargo, Eman a enfatisa cu competencia no mester impedi cooperacion. Al contrario, e paisnan Caribeño mester identifica un proposito comun cu ta permiti nan comparti conocemento, fortalece nan economia y crea oportunidadnan cu realmente ta beneficia nan pueblo. Den e sentido aki, bienestar comun mester bira e principio cu ta uni e region, independientemente di diferencia politico, economico of cultural.
Felicitacion na Corsou y Sint Maarten pa 16 aña di autonomia
Durante su discurso, Prome Minister Eman tambe a extende su felicitacion na pueblo di Corsou y Sint Maarten den cuadro di conmemoracion di 16 aña di nan status autonomo den Reino Hulandes, cu ta celebra dia 10 di october.
El a destaca cu Aruba, cu a obtene su Status Aparte na 1986, ta compronde e importancia historico di autonomia y e responsabilidad cu ta acompaña autogobernacion. Segun Eman, autonomia no ta solamente un logro constitucional, sino tambe un compromiso pa garantisa cu libertad y responsabilidad politico ta traduci den dignidad, oportunidad y bienestar pa pueblo.
Un futuro Caribeño cu bienestar di pueblo como prioridad
Na final di su discurso, Prome Minister Eman a regresa na e metafora di e mesa di domino di Frank Martinus Arion.
El a destaca cu Prome Minister Pisas a logra reuni e lidernan di diferente pais rond di un mesa Caribeño, caminda cada uno tin su propio interes, fortalesa y ambicion. E desafio, segun Eman, ta pa transforma e encuentro aki den un oportunidad pa identifica un proposito comun cu ta mas grandi cu e interes individual di cada pais. Cu su mensahe, Prome Minister Eman a pone enfasis riba necesidad di conecta crecemento economico cu progreso social, oportunidad cu igualdad y prosperidad cu bienestar.
E participacion di Aruba na Caribbean United in Excellence Summit ta forma parti di e dialogo regional pa fortalece cooperacion entre paisnan Caribeño, cu e bienestar di ciudadano como un di e prioridadnan fundamental pa futuro di e region.
