Durante su bishita di trabou na Corsou, Prome Minister di Aruba, Mike Eman, a bishita Jewish Museum Curaçao, caminda el a haya oportunidad pa profundisa den e historia di comunidad Hudio den Caribe y descubri varios conexion importante cu su propio herencia familiar. E presidente di e museo, Michèle Russel-Capriles a ricibi Prome Minister Eman, kende a expresa su satisfaccion cu finalmente por a ricibi Eman. E dos ta comparti un laso familiar cu ta conecta nan cu un parti importante di historia di Aruba y Corsou.
Durante e bishita, Mike Eman a comparti algun descubrimento reciente cu el a haci durante su investigacion tocante su bisabuelo Cornelis Hendrik Eman y su esposa Petronila Capriles. E investigacion aki a revela informacion nobo tocante e historia di su antepasadonan, incluyendo nan conexion cu comunidad Hudio y e periodo di esclavitud.
Un di e descubrimentonan cu mas a impacta e Prome Minister ta e hecho cu Petronila Capriles tabata descendiente di un persona cu a biba den esclavitud. E informacion aki a sali for di investigacion historico cu asistencia di Archivo Nacional. Eman a splica cu anteriormente el tabata pensa cu su herencia Hudio tabata bin principalmente di parti di su mama, cu su famia tin bin for di Surnam y cu a establece na Aruba durante añanan 30 di siglo pasa. Sin embargo, e investigacion reciente a revela cu tambe di parti di famia Capriles tin conexionnan historico cu comunidad Hudio. Un otro aspecto importante di e investigacion ta e historia di Juan Bautista Capriles, un antepasado relaciona cu famia di Eman, kende su nomber ta aparece riba un carta historico di protesta contra maltrato di personanan den sclavitud. Segun e Prome Minister, e contenido di e carta ta particularmente impresionante, considerando cu den e periodo ey ya tabata expresa preocupacion tocante dignidad y derecho humano, den un tempo cu e conceptonan aki ainda no tabata ampliamente reconoci. Eman a reconoce cu historia familiar por contene capitulonan dificil, incluyendo e hecho cu den su propio famia e tempo ey tabatin tambe persona cu tabata doño di esclavo. E descubrimentonan aki ta contribui na un comprension mas completo di e pasado y e diferente realidad cu ta forma parti di historia di nos region.
Durante su recorido den e museo, e Prome Minister a dedica atencion special na e historia di Ana Frank y George Maduro, dos figura cu nan bida ta relaciona cu e acontecimentonan di Segunda Guerra Mundial. E historia di Ana Frank a brinda oportunidad pa reflexiona riba e consecuencianan di discriminacion, opresion y persecucion. Eman a relaciona e experiencia historico aki cu edesafionan cu ainda ta existi den sociedad moderno, incluyendo bullying, odio y polarisacion.
Tambe e historia di George Maduro, un heroe di Segunda Guerra Mundial cu a nace na Corsou y cu a lucha contra ocupacion Aleman, a forma parti di e recorrido. Su historia ta un ehempel di curashi y resistencia durante un di e periodonan mas dificil di historia mundial. E bishita a destaca e importancia di conserva y comparti historia, no solamente pa conoce e pasado, pero tambe pa compronde e responsabilidad cu cada generacion tin pa promove respeto, tolerancia y amor pa prohimo.
Durante e intercambio cu directiva di e museo, a surgi tambe e posibilidad pa den futuro dedica un espacio na e historia di comunidad Hudio na Aruba, considerando e conexionnan historico, familiar y comercial cu ta existi entre e dos islanan. Jewish Museum Curaçao ta desempeña un papel importante den conservacion di patrimonio cultural y religioso di comunidad Hudio, cu durante siglonan a contribui na desaroyo economico y social di Corsou y e region Caribe.
