Parlamentario di AVP, Dennerich Kelly, ta pidi Gobierno di Aruba pa duna claridad tocante e implementacion di su politica pa Short-Term Vacation Rentals (STVR). Segun Kelly, Aruba tin mester di un maneho cla cu ta reconoce e contribucion economico di vacation rentals, mientras ta proteha disponibilidad di vivienda accesibel pa hendenan cu ta biba y traha na nos isla.
Kelly a recorda cu na april 2024, gobierno a comunica cu e politica pa vacation rentals tabata den su fase final. E maneho anuncia tabata inclui registracion di propietario, un proceso di permiso, inspeccion di higiene y siguridad, y cumplimento cu impuestonan relevante. Awor cu nos ta na 2026, e parlamentario ta considera necesario pa gobierno informa pueblo unda e proceso ta para y cua medidanan concreto ta implementa.
Pa Kelly, regulacion efectivo mester reconoce cu no tur propietario tin e mesun tipo di operacion ni e mesun impacto riba mercado di vivienda.
“Un ciudadano cu ta huur un camber den su propio cas of un propiedad adicional no necesariamente tin e mesun impacto cu un operador cu ta maneha varios vivienda exclusivamente como negoshi turistico,” Kelly a expresa.
E parlamentario ta enfatisa cu e diferencia aki mester forma parti di e analisis pa determina un maneho apropia pa Aruba. Un ciudadano cu ta genera un entrada adicional y un operacion comercial cu varios unidad no mester wordo trata automaticamente como si nan ta representa e mesun situacion.
Den e contexto aki, Kelly ta pidi gobierno pa analisa si Aruba tin necesidad di instrumentonan manera zoning, diferenciacion entre tipo di operador y otro mecanismo pa evita concentracion excesivo di vacation rentals den areanan residencial. E evaluacion mester ta basa riba data y riba e realidad di cada area.
“Regulacion inteligente ta reconoce diferencia. E meta no mester ta pa castiga e ciudadano cu ta purbando di genera un entrada extra. E meta mester ta pa nos sa exactamente kico ta pasando den nos mercado y evita cu vivienda lo bira algo cu e propio hende cu ta biba y traha na Aruba no por paga,” Kelly a enfatisa.
Pa por tuma decisionnan fundamenta, e parlamentario ta pidi cifranan actualisa tocante cantidad di STVR, nan concentracion pa area y e tiponan di propiedad cu ta wordo ofreci. Alabes, e ta pidi informacion tocante disponibilidad di vivienda pa huur di largo plazo y e desaroyo di prijs di vivienda.
Segun Kelly, e informacion aki ta necesario pa evalua e relacion entre crecemento di vacation rentals y e retonan den mercado di vivienda, sin saca conclusionnan di antemano. E importancia economico di e sector mester wordo considera hunto cu e necesidad di residentenan pa haya un lugar accesibel pa biba.
Kelly ta considera tambe cu e discusion mester continua cu participacion di gobierno, sector turistico, sector inmobiliario, representantenan di STVR y residentenan cu ta confronta dificultad pa haya vivienda. Un maneho sostenibel mester tene cuenta cu e diferente interesnan y cu e realidad di esnan cu ta sinti e presion den mercado.
“Nos no mester specula. Nos mester midi. Y for di e realidad cu e data ta mustra, nos mester determina cua ta e balans sostenibel pa Aruba,” Kelly a conclui.
