Fraccion AVP, representa pa su lider Jennifer Arends-Reyes, a ricibi dialuna atardi un manifesto for di partido PPA entrega door di Otmar Oduber. E documento ta presenta e preocupacion y peticionnan di e organisacion politico miembro di Parlamento di Aruba relaciona cu proteccion huridico di personanan cu ta ocupa un cargo politico, cu atencion particular pa e garantianan cu ta aplica den Reino.
Den e manifesto, Oduber ta pidi atencion pa e proteccion huridico di mandatarionan na Aruba compara cu Hulanda. E planteamentonan ta pone un asunto di importancia institucional dilanti di Parlamento: con ta garantisa responsabilidad den funcion publico, igualdad dilanti di ley y e debido proteccion huridico den un Estado di Derecho.
Arends-Reyes ta considera cu un tema di tal alcance ta merece un evaluacion serio y cuidadoso. Ricibi e manifesto ta forma parti di e dialogo democratico y di e espacio cu parlamento ta ofrece pa presenta preocupacionnan y proposicionnan. Un posicion riba e peticionnan, sin embargo, mester ta basa riba un analisis di e contenido, e argumentonan y e implicacionnan pa Aruba.
Pa Fraccion AVP, cualkier discusion riba e tema mester tuma lugar cu pleno respet pa e independencia di e poder hudicial y pa e responsabilidad di cada institucion den nos Estado di Derecho. Proteccion huridico, integridad den funcion publico y rendicion di cuenta ta principionan cu mester wordo considera hunto, cu igualdad dilanti di ley como punto di salida.
E responsabilidad di parlamento ta pa evalua e planteamentonan cu seriedad, teniendo e interes general di Aruba na prome lugar. Esaki ta exigi un tratamento cu ta contribui na claridad y confianza den nos institutonan.
Fraccion AVP lo duna siguimento na e tema den e marco di su labor parlamentario, cu e debido atencion pa e garantianan huridico y e principionan cu ta sostene nos Estado di Derecho.
