Un salario mas halto ta zona bon y bunita. Pero si despues supermercado subi, servicio subi y costo di haci negoshi subi, cuanto di e aumento realmente ta keda den saco di e trahador?
Esey ta e pregunta cu parlamentario di PPA, Eduard Pieters ta trece dilanti na Gobierno relaciona cu un posibel aumento considerabel di e salario minimo.
Pieters ta cla riba un punto: e gap entre salario minimo y ‘bestaansminimum’ mester cera. Pero e no ta di acuerdo pa haci e aumento aki acelera y sin analisa su efecto completo riba nos economia. “Claro cu nos mester cera e gap. Pero si gobierno hacie den e forma aki, sin calcula y prepara p’e consecuencianan, no tin sentido.”
E problema no ta solamente salario; ta costo di bida
Pieters su argumento ta, cu Aruba no por discuti salario minimo separa for di realidad economico. Costo di bida ya ta halto. Aruba ta depende fuertemente di producto importa, particularmente for di Merca y aumento di prijs internacional eventualmente y logicamente ta sintie localmente. Relaciona cu esaki, Pieters ta señala e efecto di sistema di nos BBO, cu segun Pieters ta aumenta e presion riba prijs, segun cu e producto ta pasa den cadena comercial debi cu BBO ta acumulativo
P’esey e ta alerta: agrega un aumento fuerte di costo laboral na e scenario aki y Gobierno lo crea un Warwaru, un “perfect storm” cu lo rebenta e isla aki for di otro.
Ken ta paga e aumento na final?
Pieters ta cuestiona e idea cu empresa simplemente lo absorba costo adicional.
Un comerciante cu mester paga mas salario tin cu busca unda e lo recupera e gasto. Segun Pieters, den hopi caso esaki lo termina incorpora den prijs di producto of servicio.
“Comerciante no ta bay sali perdi. E ta calcula esaki den su prijs. Y na final, nos como pueblo tin cu paga. Pues aunke bo ta haya mas placa, bo no lo tin mas placa den bo cartera, paso e lo bay bek den comercio di un manera of otro. Sino comercio no lo sobrebibi.”
E riesgo, pues, ta un circulo: salario ta subi, costo di empresa ta subi, prijs ta subi y parti di e aumento salarial ta perde totalmente su balor.
E efecto domino den empresa
Y e impacto, segun Pieters, no ta stop cu empleado cu ta cobra salario minimo. Si salario minimo di trahador subi, e diferencia entre e pago na e supervisor y manager ta bira mas chikito. Pues supervisor lo pidi ahuste y manager tambe lo haci e mesun cos.
Asina un cambio a base di escala salarial por crea presion riba henter structura salarial di un empresa. Pieters ta cuestiona si Gobierno a calcula e efecto domino aki prome cu presenta aumento como solucion.
Aumento no ta igual na poder di compra
Pieters a uza situacion di e pensionadonan tambe pa ilustra su punto: un beneficio adicional ta positivo, pero si costo di alimento y otro necesidad basico sigui subi, calidad di bida no necesariamente ta mehora den e mesun proporcion. Pues practicamente gobierno lo core campaña bisa cu a subi salario minimo, pero costo di bida y poder di compra tambe a aumenta.
P’esey, segun PPA, e discusion no mester bira un competencia politico riba ken por anuncia e cifra mas grandi. E resultado mester ta midi na mesa di cas: hende realmente por cumpra mas, paga nan cuenta y biba cu mas dignidad?
Pieters su advertencia ta simpel: “Gobierno por aumenta e cifra riba slip di pago. Pero si e mesun decision ta pusha p’e prijsnan bira mas halto, pueblo por termina cu mas salario, pero sin tin mas poder di compra.
