Durante e presentacion nacional di proyectonan di inversion di Gabinete AVP-FUTURO dilanti di Hulp Bestuurskantoor na San Nicolas, Prome Minister Mike Eman a enfatisa cu desaroyo di pais mester trece un diferencia concreto den bida di hende. Despues di e presentacionnan di e ministronan, el a reafirma su compromiso cu pensionadonan, famianan di menos recurso y esnan mas vulnerabel. E evento a sigui e aprobacion di e presupuesto di AIOF pa 2026 y 2027 y a inclui tambe inversionnan cu otro fuente di financiamento. Den e marco aki, Eman a conecta e plannan di Gobierno cu e necesidad pa crea mas oportunidad y siguridad socioeconmico pa nos comunidad.
Bienestar di esnan di menos recurso
Eman a subraya cu su regreso como Prome Minister tabatin un motivacion social profundo: haci un diferencia pa esnan cu tin menos recurso. El a destaca e aumento di 500 florin riba pension como un paso concreto den e direccion aki. Tambe e prome mandatario a papia di e presion financiero cu personanan cu salario minimo ta enfrenta. Gastonan pa remedi, educacion di yiunan y necesidadnan basico ta pone hopi famia den un situacion dificil. Den e contexto aki, Eman a expresa e speransa cu durante e aña aki ainda lo por pasa un ley den Parlamento pa garantisa cu e entrada di un persona cu salario minimo ta alcansa e bestaansminimum. Tambe a menciona e importancia di e dialogo cu e doñonan di trabou pa avansa cu e meta aki. Eman a reafirma cu e compromiso di Gobierno ta inclui nos pensionadonan, persona cu un limitacion y famia cu ta biba cu un entrada limita. E meta ta pa e plannan y decisionnan di gobierno contribui na un miho calidad di bida pa nos tur.
Confiansa den e ekipo y continuidad di trabou
Den su palabranan di reconocemento na e ministernan, Eman a destaca tanto nan capacidad como nan disposicion pa sirbi. El a expresa cu e presentacionnan a fortifica su confiansa cu e trabou, dedicacion y compromiso lo continua durante e cambio di liderazgo y e traspaso di e responsabilidadnan cu lo tuma luga pronto. El a duna atencion particular na Minister Wendrick Cicilia, destacando su capacidad pa conecta e necesidadnan di turismo cu e calidad di bida di nos comunidad. Eman a enfatisa e importancia di mira mas leu cu un obra di infrastructura y compronde kico e inversion ta nifica pa e hende cu ta biba den e area. Tambe el a reconoce e contribucion di su coleganan minister pa crea e base financiero y legislativo pa e proyectonan, unda tambe ta atende esnan mas vulnerabel, trece mehora den enseñansa, crea oportunidad pa nos hobennan y proteha e siguridad di Aruba.
Eman a expresa su confiansa den e ekipo di minister cu lo sigui carga e responsabilidadnan di gobernacion entrante prome di januari 2027 ora cu Mike Eman baha como prome minister. Su mensahe a pone e enfasis riba continuidad di servicio y e compromiso pa percura cu e progreso di Aruba ta alcansa tambe esnan cu mas mester di mas apoyo.
