Un otro paso importante den revitalisacion di centro di Oranjestad a bira realidad. Diaranson mainta, Minister di Finansa, Asunto Economico y Sector Primario, Geoffrey Wever, hunto Prome Minister Mike Eman, acompaña pa Sra. Petra Davis di Stichting Monumentenfonds Aruba (SMFA) a marca oficialmente inicio di e trabounan di restauracion di e historico edificio John G. Eman, anteriormente conoci como edificio di Aruba Bank, situa na Caya G.F. Betico Croes.
Cu e acto simbolico aki, un proyecto cu durante ultimo añanan a pasa door di diferente fase di preparacion, estudio, negociacion y coordinacion, ta drenta su fase di ehecucion. E momento aki ta representa un logro importante, no solamente pa preservacion di patrimonio historico, sino tambe pa e vision mas amplio di Minister Wever pa revitalisa centro di Oranjestad, stimula actividad economico y crea un centro di cuidad mas atractivo, dinamico y habitable.
E restauracion di edificio John G. Eman ta resultado di un trayectoria di varios aña. Na december 2024, Minister Wever a firma un acuerdo di intencion cu Aruba Bank N.V., Stichting Monumentenfonds Aruba y Nationaal Restauratiefonds, estableciendo e base pa restauracion y futuro uso di e edificio.
Na december 2025, e entrega oficial di e edificio na Stichting Monumentenfonds Aruba a marca un siguiente paso importante. Durante 2026, e preparacion tecnico, diseñonan y proceso di aanbesteding a continua, cu e promer fase enfoca riba eliminacion di e partinan no-monumental pa prepara e edificio pa restauracion.
Cu e acto oficial di diaranson mainta, e proyecto ta pasa di planificacion pa ehecucion concreto.
E edificio lo wordo restaura cu respet pa su balor historico y arkiitectonico, y transforma den un espacio multifuncional. E plannan ta encera oficinanan pa Centraal Bureau voor de Statistiek (CBS) y Sociaal Economische Raad (SER), combina cu un apartamento y espacio comercial pa horeca cu terasa.
E combinacion aki ta contribui na un fluho constante di hende cu ta traha, biba y bishita centro di Oranjestad, creando mas oportunidad pa actividad comercial y fortalecemento di economia local.
E proyecto John G. Eman ta forma parti di e vision y strategia di Gobierno AVP-FUTURO 2025-2028 pa trece bida bek den centro di Oranjestad. E restauracion di Cas Veneranda, cu ya ta acomoda Directie Economische Zaken y un espacio pa horeca, y e transformacion di e antiguo edificio di Ministerio Publico den apartamentonan y espacio comercial, embeyecemento di Wilhelminatraat ta otro ehempelnan concreto di e vision aki.
“Revitalisacion di Oranjestad no ta solamente restaura edificionan. E ta trata di crea actividad economico, oportunidadnan nobo y un centro di cuidad caminda hende ta biba, traha y disfruta. Cu e proyecto aki nos ta demostra cu un vision cla, planificacion y colaboracion por transforma nos patrimonio historico den un inversion pa futuro di Aruba,” Minister Wever a enfatisa.
Minister Wever ta gradici Aruba Bank N.V., Stichting Monumentenfonds Aruba, Nationaal Restauratiefonds y tur e partnernan involucra pa nan compromiso y colaboracion.
“Awe nos ta marca un otro paso concreto den revitalisacion di Oranjestad. Nos ta sigui transforma plannan den resultado, proyecto pa proyecto, cu e meta pa debolbe nos centro di cuidad su dinamismo y fortalece economia di Aruba,” Minister Wever ta conclui.
