Cu aprobacion di e prome presupuesto di Algemeen Investerings- en Ontwikkelingsfonds (AIOF) pa 2026 y 2027, y presentacion di e agenda nacional di inversion na comunidad cu a tuma luga dialuna anochi na San Nicolas, Gobierno AVP-FUTURO ta duna un paso importante pa transforma prioridadnan di pais den proyectonan concreto cu mester contribui na un Aruba mas fuerte, moderno y sostenibel.
Minister Gerlien Croes ta indica cu e momento aki ta importante, pasobra pueblo di Aruba por haya un bista mas amplio di e direccion cu Gobierno kier bay y e inversionnan cu ta den preparacion of cu lo inicia den e proximo periodo den cuadro di entre otro, AIOF.
“Awe nos ta papia di futuro, pero un futuro cu nos mester cuminsa construi for di awe. E proyectonan cu Gobierno a presenta ta representa inversion den nos pais, nos comunidad y principalmente den calidad di bida di pueblo di Aruba,” Minister Gerlien Croes a expresa.
Durante e presentacion na San Nicolas, tur minister di Gabinete AVP-FUTURO a presenta proyectonan y inversionnan importante dentro di nan respectivo responsabilidad. Esey a brinda comunidad un panorama mas amplio di e trabou cu ta tumando luga den diferente sector y e prioridadnan cu Gobierno ta pone pa e proximo añanan.
E agenda di inversion no ta limita exclusivamente na proyectonan financia mediante AIOF. Gobierno ta traha cu diferente fuente di financiamento, presupuesto ordinario, cooperacion institucional y otro mecanismonan pa realisa inversionnan cu ta necesario pa desaroyo di Aruba.
Segun Minister Gerlien Croes, e importancia di e enfoke aki ta cu e diferente inversionnan no mester wordo mira como proyectonan separa, sino como parti di un vision mas amplio pa futuro di pais.
“Un pais ta move hunto padilanti ora tin vision, planificacion y continuidad. Nos mester por conecta e necesidadnan cu tin awe cu e Aruba cu nos kier laga pa e siguiente generacion. Esey ta e responsabilidad cu nos tin como Gobierno,” Minister Gerlien Croes a declara.
Cu AIOF, Pais Aruba tin un instrumento cu ta permiti planificacion di inversionnan publico pa varios aña. Esaki ta importante, teniendo cuenta cu proyectonan grandi ta pasa door di diferente fase di preparacion, diseño, evaluacion, financiamento y finalmente ehecucion.
Minister Gerlien Croes ta sostene cu e posibilidad pa planifica riba termino mas largo ta yuda crea mas continuidad entre e vision di Gobierno y e resultado cu comunidad finalmente mester por mira y sinti.
“Nos no por mira inversion publico solamente for di e perspectiva di cuanto placa ta wordo inverti. Nos mester por mira kico e inversion ta entrega na comunidad, cua problema e ta resolve y cua oportunidad e ta crea. Al final, resultado pa pueblo ta loke ta conta,” Minister Gerlien Croes a enfatisa.
E aprobacion di e prome presupuesto di AIOF ta sigui un proceso cu a inclui creacion legal di e fondo, preparacion presupuestario, tratamento di preguntanan parlamentario y un debate amplio den Parlamento. Pa Minister Gerlien Croes, e proceso aki ta parti di e responsabilidad cu Gobierno tin ora ta trata di recursonan publico.
Transparencia, control y rendicion di cuenta mester sigui forma parti integral di cada fase, for di preparacion di un proyecto te cu su ehecucion y evaluacion.
Minister Gerlien Croes ta enfatisa cu e siguiente paso ta igualmente importante: transforma e planificacion den accion concreto.
“Pueblo kier mira progreso. E responsabilidad di Gobierno ta pa prepara e proyectonan bon, sigui e proceduranan necesario y despues pasa na ehecucion. Anuncio ta un paso, pero resultado ta e meta,” Minister Gerlien Croes a expresa.
E agenda nacional di inversion ta conecta cu e prioridadnan di Programa di Gobernacion AVP-FUTURO 2025–2028 y ta enfoca riba mehoracion duradero di calidad di bida, modernisacion di Aruba y fortalecemento di e condicionnan necesario pa desaroyo futuro.
Minister Gerlien Croes ta considera cu e presentacion di e proyectonan na comunidad ta tambe un compromiso pa sigui comunica cu transparencia tocante progreso y ehecucion.
“Nos ta inverti pa Aruba di awe, pero tambe pa Aruba di mañan. Esey ta exigi responsabilidad, continuidad y principalmente accion. Nos compromiso ta pa sigui traha y transforma vision den resultado concreto cu pueblo di Aruba por mira y sinti.”
Segun Minister Gerlien Croes, e agenda di inversion ta marca un direccion cla: inverti cu responsabilidad, ehecuta cu determinacion y construi cu vision.
“Aruba su futuro no ta algo cu nos mester warda riba dje. Nos mester construi esaki. Y esaki nos ta haci hunto, paso pa paso, proyecto pa proyecto, pa un Aruba mas fuerte y cu mas oportunidad pa nos TUR,” Minister Gerlien Croes a conclui.
