Durante e ceremonia di cende luz ros na Bestuurskantoor, Prome Minister Mike Eman a comparti su experencia personal tocante e lucha contra cancer cu su esposa Doina Eman a enfrenta durante e pandemia di COVID-19. Cu su relato, e prome minister a destaca cu, banda di tratamento medico, e solidaridad y sosten di comunidad ta di gran importancia pa e personanan cu ta enfrenta e malesa aki. E actividad, organisa pa Ministerio di Salubridad, Asunto Social, Cuido di Adulto Mayor y Maneho di Adiccion, a tuma luga den cuadro di luna di conscientisacion di cancer na pecho, cu e meta di promove prevencion, deteccion na tempo y solidaridad cu personanan cu ta enfrenta cancer den sinergia cu Fundacion ABO.
Durante su discurso, Prome Minister Eman a reflexiona riba e impacto cu un diagnosis di cancer tin riba un famia. El a splica cu ora un miembro di famia haya cancer, henter e famia ta enfrenta un periodo dificil, yena cu incertidumbre, preocupacion y miedo pa loke futuro por trece. E prome minister a recorda e periodo cu su esposa Doina mester a pasa den tratamento di kimoterapia. E experiencia aki a mustra e importancia di tratamento medico, pero tambe di e sosten emocional cu un persona mester durante un proceso asina dificil.
Bestuurskantoor ilumina ros den solidaridad cu personanan cu ta enfrenta cancer
E ceremonia a conta cu participacion di doctor Vanessa Williams y e discursonan di Minister Mervin Wyatt-Ras y Prome Minister Mike Eman. E iluminacion di Bestuurskantoor den color ros ta forma parti di e campaña Make Aruba Pink, cu ta busca crea mas conscientisacion tocante cancer na pecho y motiva ciudadanonan pa haci nan chekeonan di salud na tempo.
Durante su discurso, Prome Minister Eman a expresa su aprecio na tur esnan cu a haci e programanan di screening posibel, como tambe na personanan y organisacionnan cu ta traha diariamente pa conscientisa comunidad tocante cancer.
El a haci un yamada pa Aruba keda uni y pa comunidad sigui brinda sosten na e personanan cu ta enfrenta e malesa aki, como tambe motiva esnan cu ainda no a tuma e paso pa haci nan chekeonan medico.
Minister Mervin Wyatt-Ras ta destaca importancia di prevencion y deteccion na tempo
Durante e ceremonia, Minister di Salubridad, Asunto Social, Cuido di Adulto Mayor y Maneho di Adiccion, Mervin Wyatt-Ras, tambe a dirigi palabra na e presentenan. E minister a destaca cu e iluminacion ros di Bestuurskantoor ta representa mucho mas cu un gesto simbolico. E ta un expresion di solidaridad cu e personanan cu ta enfrenta cancer, esnan cu ta ricibi tratamento, esnan cu a logra vence e malesa y tambe pa recorda esnan cu a perde nan bida debi na cancer. Minister Wyatt-Ras a enfatisa cu prevencion, informacion y deteccion na tempo ta forma parti importante di e agenda di salud di Gobierno di Aruba.
Den e cuadro aki, e minister a destaca e trabou di Fundacion ABO, cu mediante e programa BOB ta promove deteccion na tempo di cancer na pecho. Tambe a expresa reconocimento na doctora Vanessa Williams pa su contribucion na introduccion y desaroyo di e programa di screening na Aruba. E minister tambe a destaca e fortalesa di Doina Eman durante su lucha contra cancer, como tambe e sosten cu Prome Minister Mike Eman a brinda su esposa durante e proceso di tratamento. Segun Wyatt-Ras, e lucha contra cancer ta un responsabilidad comparti entre Gobierno, nos profesionalnan di salud, fundacionnan y comunidad. E minister a reafirma e compromiso di Gobierno di Aruba pa sigui fortalece e cooperacion y e programanan di prevencion y deteccion na tempo.
Un experiencia dificil durante pandemia di COVID-19 pa famia Eman
Como ehempel di e solidaridad aki, Eman a menciona su amigo Chomon y Debby Arends, cu durante e periodo di tratamento tabata yega mainta trempan na nan cas cu un termo di awa di coco cada biaha cu Doina mester a bai pa su tratamento di kimoterapia. Nan tabata haci esaki cu e intencion di yuda Doina mantene su forsa durante e proceso. E prome minister tambe a expresa su agradecimento na actual parlamentario Clifford Heyliger, cu durante e periodo di lockdown, ora cu contacto personal tabata limita, regularmente tabata yama nan pa comparti un oracion na telefon. Cu e ehempelnan aki, Eman a destaca con gestonan simpel di solidaridad, atencion y cariño por significa hopi pa un persona cu ta enfrenta un malesa serio.
Un di e momentonan mas impactante di su discurso tabata ora Prome Minister Eman a relata un situacion cu a presenta durante tratamento di su esposa. El a splica cu, debi na e kimoterapia, sistema inmunologico di Doina tabata hopi debil. Na mes momento, Aruba tabata enfrenta e pandemia di COVID-19, cu hopi restriccion y preocupacion rond di e riesgo di infeccion. Durante un anochi, Doina a haya un keintura di aproximadamente 39 grado. Segun e instruccionnan cu e famia a ricibi di e personal medico, si su temperatura subi, nan mester a acudi na Eerste Hulp di biaha. Sin embargo, considerando e situacion di COVID-19 na hospital y e vulnerabilidad di Doina, nan a duda pa un momento si nan mester a bay.
Eman a relata cu, despues cu nan a yama e servicio medico pero no a presenta na hospital, personal di e centro di oncologia a bolbe yama nan dentro di aproximadamente un ora pa puntra pakico nan no a yega ainda. Pa Prome Minister Eman, e experiencia aki ta un ehempel di e dedicacion y responsabilidad di e profesionalnan di salud na Aruba, cu a pesar di e presion grandi durante pandemia, a sigui presta atencion personal na nan pashentnan. El a expresa su profundo agradecimento na e personal di e departamento di oncologia y na tur e profesionalnan di salud cu diariamente ta cuida pashent cu ta enfrenta cancer. Eman a destaca tambe cu Aruba, a pesar di ta un isla chikito, tin e posibilidad di ofrece servicio di oncologia y radiologia, permitiendo pashent ricibi tratamento cerca di nan famia y nan sernan keri. Segun e prome minister, esaki ta un bendicion grandi pa Aruba, considerando e importancia di sosten familiar durante e proceso di tratamento y recuperacion.
Cu e iluminacion ros di Bestuurskantoor, Gobierno di Aruba ta reafirma su solidaridad cu tur persona afecta pa cancer y e importancia di sigui traha hunto pa un Aruba mas saludabel, consciente y solidario.
