Pueblo ta paga y gobierno ta cobra. Pero ora automobilista sali riba caminda, unda e ta mira su placa bek? Cu e pregunta ey, parlamentario Eduard Pieters a confronta Gobierno riba e estado di nos camindanan y e prioridadnan cu coalicion ta pone. Segun Pieters, entrada relaciona cu vehiculo ta genera miyones pa pais. P’esey PPA a presenta un mocion concreto na mei 2026: no pa gasta tur e placa na caminda, pero pa Gobierno studia y presenta na Parlamento, den seis luna, un plan pa destina un parti structural di e entrada ey na reparacion y asfaltamento. Pero un biaha mas, e proposicion ey no a pasa. Y pa Pieters, ey ta unda e problema politico ta cuminsa.
“No tin boluntad”
PPA no a pidi pa Gobierno drecha tur caminda di Aruba di un dia pa otro. Segun Pieters, e proposicion tabata simplemente pa crea un sistema: cobra placa di automobilista y laga parti di dje bolbe visiblemente den infrastructura di caminda. “Nos tur kier mihor caminda. E problema ta, cu Gobierno no tin boluntad.”
Pieters su argumento ta, cu ciudadano ta mas dispuesto pa acepta e contribucionnan, ora e por mira resultado. Pero ora Gobierno cobra impuesto, mientras caminda ta sigui deteriora, e pregunta inevitabel ta: “Kico Gobierno ta haci cu e prioridadnan di pueblo?”
“Puro show, un Gobierno di fiesta”
Pieters a subi tono di su critica y a acusa Gobierno di confundi visibilidad cu gobernacion.
“Show, puro show. Ban bek caya, fiesta aki aya… pues un Gobierno di fiesta.”
Segun Pieters, mientras ciudadano ta sinti costo di bida, prijs di supermercado y deterioro di infrastructura, demasiado energia politico ta bay na e actividadnan publico y bendemento di imagen. El a critica incluso prioridad di liderazgo politico durante ora di trabou, cu ta demostra un contraste di actividad simbolico cu dossiernan cu, ta hopi mas fundamental pa futuro di Aruba. Su mensahe: pueblo no ta paga Gobierno pa haci show. Pueblo ta paga Gobierno pa tuma decision.
FUTURO ta tene Gobierno AVP-FUTURO “hostage”
Pero Pieters su acusacion mas fuerte tabata dirigi na relacion interno di coalicion.
Segun Pieters, e partido mas chikito, FUTURO, a logra un posicion caminda e tin demasiado influencia riba direccion di Gobierno, mientras AVP, e partido mas grandi den coalicion, no ta mustra e liderazgo cu Pieters ta asocia cu su historia. El a describi Gobierno como “hostage” di e relacion ey. Pieters incluso a expresa su decepcion den AVP: “Ami no conoce AVP asina. AVP semper tabata un partido cu ta mustra direccion y cu ta tuma accion.”
Pa Pieters, e problema no ta solamente ken tin mas poder dentro di coalicion. E pregunta ta kico pueblo ta haya como resultado.
Finalmente PPA ta pone un propuesta riba mesa pa trece solucion sostenibel y duradero, pero coalicion a rechase. E camindanan ta sigui exigi inversion y mientrastanto, segun Pieters, show ta continua. “Gobernacion no ta fiesta, no ta verfmento y no ta djis potret cu yen di fanfaria. Gobernacion ta tuma decision y laga pueblo mira unda su placa ta bay.”
