Parlamentario Jennifer Arends-Reyes a entrega un reconocemento special na Minister René Gervais “Baba” Herdé, como expresion di gratitud pa su trayectoria, lealtad y valioso contribucion na AVP durante hopi aña. E distincion ta reconoce su dedicacion na e partido y su servicio na Aruba.
E entrega a tuma luga den presencia di su coleganan di partido Maria van der Biezen y Minister Arthur Dowers. Durante e encuentro, a honra e trayectoria di Herdé y e tempo y esfuerzo cu el a dedica na e organisacion politico.
Como parti di e reconocemento di su contribucion, Minister “Baba” Herdé a wordo nombra tambe miembro honorario di Conseho di Partido di AVP. E nombramento ta un señal di respet y aprecio pa e papel cu el a desempeña den e partido durante su trayectoria.
Pa Arends-Reyes, ta importante pa reconoce esnan cu a contribui na desaroyo di e organisacion y cu a sigui brinda nan conocemento y experiencia durante e añanan. E ta considera cu expresa gratitud na e personanan aki ta tambe un manera pa mantene e historia di e partido bibo y pasa e ehempel di servicio pa e siguiente generacion.
E parlamentario a felicita Minister “Baba” Herdé cu e distincion y a expresa su gradicimento pa su dedicacion, tanto na AVP como na Aruba. E reconocemento ta subraya e balor cu e partido ta duna na un trayectoria di lealtad y servicio, y na e hendenan cu a yuda construi su historia.
