E tratamento di jaarrekening 2020 den Parlamento di Aruba mester trece claridad tocante e uzo di recurso publico y contribui na mehoracion di administracion financiero. Esaki ta e enfoke di parlamentario Jennifer Arends-Reyes, lider di fraccion di AVP, kende ta enfatisa e importancia di transparencia, dunament’i cuenta na tempo y siguimento concreto na deficiencianan.
E jaarrekening 2020 ta presenta un saldo negativo di aproximadamente Afl. 739,6 miyon, den un aña excepcional marca pa e pandemia di COVID-19. E crisis sanitario tabatin un impacto profundo riba economia, entradanan di gobierno y bida di famianan na Aruba.
“Nos tur ta corda e incertidumbre di 2020. Hendenan tabata preocupa pa nan salud, nan trabou y con nan lo sostene nan famia. E contexto ey mester forma parti di e debate. Alabes, nos pueblo tin derecho di sa con e recursonan publico a wordo uza y con e decisionnan financiero a wordo tuma,” Arends-Reyes ta expresa.
Pa e lider di fraccion, e tratamento di un jaarrekening ta un instrumento esencial pa Parlamento ehecuta su tarea di control. E informacion mester permiti un evaluacion cla di e entradanan, gastonan y resultado di e maneho financiero di gobierno durante e aña.
Dunament’i cuenta mester ta na tempo
Arends-Reyes ta señala cu e hecho cu e jaarrekening di 2020 ta wordo trata na 2026 ta subraya e necesidad pa elimina atraso den dunament’i cuenta. Ora informacion financiero ta yega añanan despues, parlamento tin menos oportunidad pa identifica problema y impulsa coreccion na e momento cu esey ta necesario.
“Nos mester traha pa un situacion caminda parlamento por evalua e cifranan na tempo. Asina nos por haci pregunta, exigi claridad y mira si e medidanan cu ta wordo anuncia realmente ta trece e mehoracion cu nos pueblo ta spera,” e ta enfatisa.
Segun e parlamentario, e meta mester ta un proceso di dunament’i cuenta cu ta permiti siguimento oportuno, cu informacion confiabel y claridad tocante e responsabilidad pa atende deficiencianan.
Bon administracion ta sostene servicio na comunidad
Pa Arends-Reyes, calidad di administracion financiero ta conecta directamente cu e capacidad di gobierno pa atende e necesidadnan di pueblo. Cada florin publico mester wordo administra cu cuido, teniendo cuenta cu e recursonan aki ta necesario pa educacion, salud, siguridad y otro servicio esencial.
P’esey, e debate tocante jaarrekening 2020 mester contribui na fortifica control interno, mehora informacion financiero y percura pa e lesnan di e pasado ta wordo aplica den e maneho actual y futuro.
E parlamentario ta considera importante pa e evaluacion bay compaña pa siguimento concreto, pa Parlamento por determina si e deficiencianan identifica ta wordo corigi.
“Nos responsabilidad ta cu e pueblo di Aruba. Nos mester saca les di loke a pasa y percura pa e lesnan ey traduci den mehoracion concreto. Transparencia y responsabilidad mester ta parti di e trabou diario di gobierno. Asina nos ta fortifica confianza y proteha e recursonan di nos pueblo,” Arends-Reyes ta conclui.
