Un momento importante pa desaroyo di deporte na Aruba. Minister di Relacionnan den Reino, Educacion, Hubentud, Innovacion y Deporte, sra. mr. Gerlien Croes, a ricibi cu honor y placer Su Excelencia Sheikh Joaan Bin Hamad Al Thani di Qatar, Presidente di Olympic Council of Asia y e Presidente di World Aquatics, durante un encuentro special cu a conta tambe cu participacion di representantenan di World Aquatics, Federacion di Natacion Aruba y Comite Olimpico Arubano (COA).
E encuentro a brinda un oportunidad valioso pa fortalece relacionnan internacional y explora posibilidadnan di cooperacion pa sigui impulsa desaroyo deportivo na Aruba y den nos region.
Un di e momentonan mas importante di e encuentro tabata formalisacion di e contrato pa realisacion di e di dos piscina na e facilidad di Piscina Olimpico Roly Bisslik, un paso significativo den e esfuerzo pa sigui amplia y modernisa infarstructura deportivo di Aruba.
Minister Gerlien Croes a expresa su satisfaccion cu e adelanto aki, destacando cu inversion den facilidadnan deportivo ta fundamental pa brinda nos atletanan e condicionnan necesario pa nan por desaroya nan talento y prepara nan mes pa competencia na nivel nacional y internacional.
“Awe ta un dia special pa deporte na Aruba. Cu hopi honor nos a ricibi Su Excelencia Sheikh Joaan Bin Hamad Al Thani hunto cu Presidente di World Aquatics, y na mes momento nos a formalisa un paso importante pa e futuro di nos infrastructura di natacion. E di dos piscina na Roly Bisslik ta representa mas oportunidad pa nos atletanan, nos federacionnan y e siguiente generacion di talento deportivo arubano,” Minister Gerlien Croes a expresa.
Durante e intercambio, Su Excelencia Sheikh Joaan Bin Hamad Al Thani a comparti su interes y compromiso pa contribui na fortalecemento y desaroyo di deporte den e region. Minister Gerlien Croes ta considera e acercamento aki un oportunidad importante pa sigui construi relacionnan internacional cu por beneficia deporte arubano riba termino largo.
E proyecto di e di dos piscina na Roly Bisslik ta forma parti di e vision pa fortalece facilidadnan deportivo y crea mas espacio pa entrenamento, preparacion y desaroyo di diferente disciplina acuatico.
Segun Minister Gerlien Croes, e inversionnan aki no ta solamente enfoca riba infrastructura, sino principalmente riba e oportunidadnan cu nan ta crea pa nos muchanan, hobennan y atletanan.
“Cada inversion den deporte ta un inversion den salud, disciplina, talento y futuro. Nos ambicion ta pa Aruba sigui crece como un pais cu ta brinda su atletanan e oportunidad pa desaroya nan potencial y representa nos bandera cu orguyo. Pa logra esaki, nos mester sigui inverti, coopera y construi relacionnan fuerte tanto local como internacionalmente,” Minister Gerlien Croes a enfatisa.
Minister Gerlien Croes ta extende su gradicimento na Su Excelencia Sheikh Joaan Bin Hamad Al Thani pa su bishita y interes den desaroyo deportivo di nos region. Un reconocemento special ta bay tambe na World Aquatics, Federacion di Natacion Aruba y Comite Olimpico Arubano pa nan participacion, cooperacion y compromiso continuo cu deporte na Aruba.
“Awe nos ta marca un paso importante, pero nos vision ta bay mas leu. Nos kier sigui construi un futuro caminda cada atleta tin oportunidad pa crece, cada talento tin espacio pa florece y Aruba por sigui posiciona su mes den deporte internacional. Hunto nos ta transforma inversion den oportunidad y oportunidad den futuro,” Minister Gerlien Croes a conclui.
