Ta berdad cu pidimento di despensa a bay for di moda?
Y awor Divorcio, Division,Abandono, ta draai manera un machine sin misericordia.
Un mucha ta rebeldia contra su mayor y mayor ta pone riba caya, y pa no pidi despensa e ta prefera di keda riba caya.
Tin hopi hende cu nos ta mira ta hiba mal bida riba caya, pasando den duro, pero nan no kier acepta nan fout y pidi despensa y reconcilia cu famia.
Hende tin asina curashi, di basha un matrimonio abao, laga yuinan desampara, perde e cas cu tanto nan a traha pe djis pasobra nan orguyo no ta permiti nan pidi despensa.
Un mucha ta wordo kita for di scol pasobra e haci malo, pero toch e no ta pidi despensa, e no ta balora su ensenansa , tampoco su educacion.
Humildad semper lo ta un sla den cara di Orguyo.
Hende ta comete un fout na trabao, ta prefera tuma un warning of schorsing y hasta un retiro, pero no kier humiya y pidi despensa.
Hende ta prefera cambia di iglesia, y bisa mi no ta bay eynan mas, pasobra nan no kier pidi despensa.
Palabra di Dios ta bisa den Hebreonan 12:14 : Aspira pa tin pas cu tur hende y tambe santidad sin cual ningun hende lo mira Senjor.
Dios no ta lubida, pasobra na final E lo presenta nos bida completo dilanti di nos, y splica cla dicon nos no por drenta cielo y mira su cara.
Humildad pa hopi hende ta parce insignificante, pero pa Dios e ta conta , e ta di gran balor, pasobra e palabra di Dios ta bisa; Pasobra aunke Senjor ta halsa, toch E ta atende e hende humilde, ma e hende orguyoso E ta conoce djaleu.( Salmo 138:6).
Kico ta mas bunita pa bisa, ma faya pordonami, ban purba di nobo, of bay for di mi , mi no kier nada di atende cu bo?.
Cuanto biaha nos ta actua orguyosamente, manera un hende cu nunca a haci fout, especialmente cu nos yiunan, hopi biaha nos no ta corda con nos tabata tempo nos tambe tabata chikito, esey no ta nifica cu nos tin di laga nos yiu comete mesun locura cu nos a comete,pero nos por duna testimonio cu nos bida , cu lo trece cambio den nan bida.
Esun cu sconde su picanan, lo no prospera,ma esun cu confesa,y laga nan lo hanja misericordia.( Proverbionan 28:13).
Orguyo di hende lo rebahe,ma esun cu ta di spirito humilde,lo ricibi honor,( Proberbionan 29:23).
Un falta di respet awe, un falta di pordon mayan, poni hunto cu duele, rabia y odio, ta sembra amargura, cu lo trece stress y depresion, y mayan cu Dios kier lo afecta e salud mental.
Un hoben por cay sera, pero mientras e ta den prison e mester wordo prepara pa bay su cas bek,y hasta por pone un session pa e hoben y su mayor por drecha cu otro prome cu e sali, pasobra no ta cumbini ningun di dos, keda sin pordona otro.( Mateo 6:14-15).
Den famia nos no por biba e sistema mundano of style politico, pensando mi ta boycott bo plan,pa ami sali mihor, pasobra ora nos ta stroba otro, nos ta stroba nos mes.
Ta recomendabel pa nos pordona y demostra cu nos ta berdadero yiu di Dios.
Pasobra Dios ta pordona y e no ta corda mas riba nos pica, awor ta ken nos ta pa bisa mi ta pordona, pero mi no ta lubida.( Hebreonan 8:12).
Ora nos pidi despensa, e enemigo tin cu bay pasobra su plan a fracasa.
Sinceramente, Pastor Marcel Balootje.
