Prome Minister Mike Eman a realisa un bishita na Nederlands Fotomuseum na Rotterdam, hunto cu Minister di Turismo, Transporte y Labor Wendrick Cicilia, director di Aruba Port Authority Marc Figaroa y director di Aruba Tourism Authority Ronella Croes. E recorido a brinda e delegacion Arubiano inspiracion pa desaroya un area di waf di Playa, cu enfasis riba conservacion di patrimonio historico y su uzo pa actividadnan cultural y social.
E delegacion a wordo ricibi pa Joanne van der Woude, Hoofd Bedrijfsvoering di Nederlands Fotomuseum, kende a expresa su satisfaccion cu e bishita. Durante e encuentro, a intercambia idean tocante con turismo, nos waf di playa y e oportunidadnan cu e sectornan aki por brinda pa arte y cultura. Prome Minister Eman a destaca cu e manera cu e edificio historico “Pakhuis Santos” a wordo restaura y transforma den un museo moderno ta un ehempel inspirador pa Aruba.
Segun e prome minister, Aruba tambe tin edificio similar na waf di Playa cu eventualmente por haya un funcion nobo como centro cultural, museo of centro di bario, specialmente den cuadro di desaroyo di area residencial. Eman a remarca cu e proyecto na Rotterdam ta demonstra con ta posibel pa conserva e caracter monumental di un edificio, mientras cu na mes momento ta adapte pa un uzo moderno cu ta contribui na desaroyo cultural y social.
Durante e recorido, e delegacion a bishita diferente piso di e museo, incluyendo su biblioteca, unda Prome Minister Eman a topa un buki tocante Antilla, e bapor conoci cu ta un atraccion popular pa esnan cu ta dive den lama di Aruba. E buki ta contene foto di Moritz Ebinger y texto di Liliana Erasmus, escritora Arubiano conoci pa su bukinan pa mucha. Prome Minister Eman a destaca e coincidencia special di finalisa e recorido den un museo na Rotterdam cu un buki cu tin un conexion directo cu Aruba.
Na final di e bishita, e prome minister a expresa su gradicimento na Joanne van der Woude y e personal di Nederlands Fotomuseum pa nan recibimento y e informacion comparti. E bishita a brinda idea pa explora e posibilidadnan di combina preservacion di patrimonio historico cu desaroyo turistico y cultural riba nos isla.
