E debate tocante futuro di turismo mester presenta pueblo un bista completo di e retonan, e pasonan cu ta tumando y e decisionnan cu ainda ta necesario. Esaki ta e posicion di parlamentario Jennifer Arends-Reyes, presidente di Comision di Turismo di Parlamento di Aruba, den reaccion na declaracionnan di lider di MEP, Evelyn Wever-Croes, tocante un supuesto falta di accion di parlamento y gobierno.
Arends-Reyes ta señala cu den e mesun articulo cu ta critica falta di accion, ta reconoce cu un reunion cu Aruba Tourism Authority (ATA) a tuma luga. Pa e parlamentario di AVP, esaki ta un paso concreto den e dialogo parlamentario tocante desaroyo di turismo y su impacto riba comunidad.
“Por tin diferencia di opinion tocante e ritmo y e siguiente pasonan, pero esey no ta nifica cu Parlamento ta keda cu brasa cruza. E debate mester reconoce e trabou cu ta wordo haci y, na mes momento, mantene atencion riba loke ainda mester sosode,” Arends-Reyes ta expresa.
Reunion cu ATA ta un paso den un trayecto mas amplio
E presidente di Comision di Turismo ta enfatisa cu e reunion cu ATA no ta contesta tur pregunta y tampoco mester ta e final di e proceso. E intercambio mester ricibi siguimento cu informacion, profundidad y participacion di e instancianan relevante.
Den e cuadro aki, Arends-Reyes ta considera importante pa amplia e dialogo cu Aruba Airport Authority (AAA), Aruba Ports Authority (APA) y otro stakeholders. E meta mester ta pa establece un bista mas completo di e capacidad di Aruba, e presion riba infrastructura y e medidanan necesario pa guia desaroyo turistico.
“Mi ta comparti e preocupacion tocante e presion riba nos camindanan, nos barionan, nos medio ambiente y acceso na cas. E calidad di bida di nos residentenan mester ta central. Pero pa atende esaki, nos mester bay mas leu cu solamente uza e palabra ‘crisis’,” e ta señala.
Pa e parlamentario, e preguntanan mester ta concreto: con pa atende cu e presion turismo ta pone riba nos infrastructura, con e beneficionan ta yega na trahadornan y famianan, y cua decisionnan ta necesario pa proteha calidad di bida di residente?
“High Value, Low Impact” mester tin nificacion pa comunidad
Arends-Reyes ta destaca cu e concepto di “High Value, Low Impact” mester traduci den prioridadnan cu pueblo por compronde y resultado cu e por sinti.
“Si nos ta papia di ‘High Value, Low Impact’, nos mester splica kico esey ta nifica pa e hende cu ta biba y traha aki. Mester trata di miho oportunidad, condicionnan di trabou, proteccion di nos naturalesa y un desaroyo cu nos isla por sostene,” e ta enfatisa.
Segun Arends-Reyes, e evaluacion di exito turistico mester inclui tanto su contribucion economico como su efecto riba bida diario di comunidad. E dialogo parlamentario mester yuda identifica e decisionnan necesario y duna seguimiento na nan implementacion.
E parlamentario ta reconoce e derecho di pueblo pa exigi resultado y e papel di oposicion pa haci pregunta y ehecuta control. Alabes, e ta subraya cu un debate husto ta exigi pa presenta tanto e preocupacionnan como e pasonan cu ta wordo tuma.
“Pueblo tin derecho di wak resultado, y oposicion tin tur derecho di haci pregunta. Pero e debate mester ta husto y completo. Mi compromiso ta pa sigui contribui na un turismo cu ta sostene nos economia y, alabes, respeta e bienestar di nos pueblo,” Arends-Reyes ta conclui.
