Diaranson merdia 2’or e agentenan M.V. y R.D., culpabel di a tira mata Ayden Lanoy a presenta den Corte dilanti Hof di Corte Superior. Tratamento no a tuma lugar sino e peticion di e Polisnan pa NFI haci mas investigacion.
SOLO DI PUEBLO por a compronde cu tabatin un discusion entre abogadonan mr. Carlo y mr. Illes y Procurador General (PG) tocante pa laga NFI haci investigacion. Na final e abogadonan a bay di acuerdo cu e proposicion di PG pa nan haci un dialogo cu NFI pa mira ki tipo di investigacion mester haci y ki experto mester usa.
PETICION DI ABOGADONAN
Den sala di Corte tabata presente famianan di e defunto Lanoy. E agente di Polis R.D. a bisa Hof cu a apela e sentencia pasobra e ta haya cu e caso aki a bay a base Landsrecherche su punto di bista y no loke realmente a pasa. Hof a bisa cu tabatin intercambio entre abogadonan y PG pa cu peticionnan pa investigacion pa tratamento di e caso.
Mr. Carlo a cuestiona e hecho cu PG a rechaza tur nan peticion cu 13 pagina. E ta puntra su mes si Ministerio Publico ta busca e berdad of ta djis e caso. E abogado ta haya cu Ministerio Publico tin e deber di busca e berdad. El a remarca cu ultimo tempo Ministerio Publico ta tuma e postura di combati crimen siendo cu e tin e funcion di busca e berdad kico a sosode. E abogado a remarca cu Ministerio Publico ta nenga e peticion y ta sigui 3 miembro di Landsrecherche. E abogado ta haya cu mester crea e oportunidad pa un experto haci investigacion. El a pidi Hof pa pa laga NFI haci investigacion y no Landsrecherche. E pregunta pa cu e investigacion ta, si e auto Toyota a core bay dilanti of bay patras. E abogado ta haya cu esey ta importante pa determina si e agentenan a acuta den defensa propio. Mr. Carlo y mr. Illes ta pidi un proceso husto y pesey ta pidi Hof pa honra e peticion pa laga NFI haci investigacion.
PG TA REACCIONA
PG a reacciona cu abogadonan ta haci ataque contra dje. E ta haya cu abogadonan no ta motiva nan peticion. Nan ta pidi pa laga NFI haci investigacion. PG a splica Hof cu for di principio a dicidi cu Landsrecherche pa laga NFI haci investigacion riba e imagennan di videonan. Na opinion di PG, e preguntanan cu abogadonan ta haci, no ta pa experto y cual experto. PG ta haya cu si organiza un dialogo cu experto lo mester pidi pa Hues Comisario regla esaki. E ta haya cu lo ta mihor un dialogo cu NFI pa determina ki experto y kico lo mester investiga.
Hof a bisa cu abogadonan ta cuestiona e conclusion di Landsrecherche pa cu nan investigacion y kier pa NFI haci investigacion. Segun mr. Carlo un experto a bisa nan cu loke Landsrecherche ta pone riba papel no ta cuadra. Abogado kier pa determina kico Landsrecherche ta constata ora cu a los e promer tiro.
Na dado momento mr. Illes a hiba palabra y a bisa cu nan ta di acuerdo cu e punto di bista di PG pa tin un dialogo cu NFI pa mira con lo mester haci investigacion y kende lo mester haci investigacion.
Hof a bisa cu e peticion di abogado pa scucha miembro di Landsrecherche, PG a bisa cu pa pone riba papel e preguntanan y Landsrecherche ta traha procesverbaal. Abogado mr. Carlo a bisa cu mester tin oportunidad di cu abogadonan lo por haci mas pregunta a base di e procesverbaal.
Hof a pospone e caso un rato pa evalua ki dia lo por tuma un decision. Hof a palabra pa 3 December 2026 lo tuma decision riba e peticion y e dia ey lo fiha un fecha pa tratamento di e caso.
APELA CONTRA 3 AÑA DI PRISON
Dia 2 di April 2026, Hues ta haya M.V. y R.D. culpabel di a tira mata Ayden Lanoy riba e anochi di 9 Februari 2025. Hues no tabata di acuerdo cu e exigencia di Fiscal di 12 luna di prison y a condena M.V. y R.D. na 3 aña di prison di cual 1 aña ta condicional cu 1 aña di prueba.
POLISNAN NO AUTORIZA PA TIRA
Hues den su sentencia a mustra cu e abogadonan di M.V. y R.D. ta haya cu e Polisnan tabata autoriza pa usa nan arma pasobra nan tabata sinti nan bida na peliger. Hues a bisa cu teniendo cuenta cu leynan di Aruba y Europa, Polis tin libertad pa usa arma pero te na un limite.
Na opinion di Hues, promer y despues di e incidente no tabatin indicacion cu Lanoy tabata arma. Tabata trata di un chofer cu tabata huy di Polis. No tabatin un situacion cu e dos Polisnan nan bida tabata na peliger. Nan a baha for di e patruya di Polis, saca arma y los tiro.
Na opinion di Hues, no tabatin necesidad pa a tira y e Polisnan no tabata autoriza segun ley pa tira.
POLISNAN NO A ACTUA DEN DEFENSA PROPIO
Hues a rechaza e ponencia di e abogadonan cu e Polisnan a actua den defensa propio. Hues tambe a reaccion riba e defensa di e abogadonan cu e Polisnan lo a pensa cu nan bida ta na peliger. Hues ta haya cu esaki tampoco ta acceptable.
Na opinion di Hues, como agentenan di Polis, tabata spera cu nan lo a actua corecto. E hecho cu nan tabatin diferente asistencia riba e dia ey, no ta kita afor cu como Polis, M.V. y R.D. mester por a actua corecto.
