Si tin dos persona cu a resalta den e ultimo añanan pa nan trabao ta Sr. Endy Croes y Sr. Rocco Tjon. Asina cu nan a debuta den politica como personanan drechi, corecto, atakenan a cuminza formalmente contra nan. Ora un politico ta bon, e por spera lama bruto. Ora un politico vocifera y pidi pa husticia wordo haci, pa trece claridad, no tin stoel pe sinta. Hasta tin hendenan cu por bolter mundo boc’abao, pretendiendo cu algo robes ora a entrega informacion na Ministerio Publico y signala asuntonan coruptivo.
Desde aña 2016 a bin sali na cla e escandalo di negoshi di tereno. E-mailsnan di Leoncita a trece tur prueba, con Leoncita tabata lanta mainta ta negosha tereno y drumi anochi ta negosha tereno. E-mailsnan personal a leak unda e tapadera di e pos di corupcion a dal habri.
Documentonan cu a sali na cla, a mustra con un cantidad di compania a wordo lanta, cu e unico intencion pa bende tereno. Leoncita no a lanta compania pa traha edificio pa su radio of pa nan imprenta. Nan a lanta compania cu e “oogmerk”, cu e unico meta pa bende tereno. E yudansa tabata bin di paden di oficina di Benny. Frederick Every tabata informa Leoncita for di paden, pe traha carta y manda pidi tal tereno. Pues, un negoshi tereno den kantoor di Benny cu por wordo yama Benny Real Estate.
E caso aki no por a pasa bay keto sin cu algo wordo haci y investiga y trece claridad.
Esun cu tin 4 aña ta pidiendo husticia ta Endy Croes. Na 2017/2018 Endy cu Rocco a acudi na Ministerio Publico pa entrega informacion importante. A bolbe copila mas datos y a entrega esaki na Ministerio Publico. Sinembargo desde eleccion 2017 a sali un corant clandestino, cu a carga e nomber “Leoncita Bisami”. Pues Ministerio Publico tabatin tur informacion caba den su poder.
Endy cu Rocco a cumpli cu pueblo di Aruba, pa exigi claridad. Laga husticia haci su trabao pa e berdad sali afo si tin cosnan robes a sosode.
Awendia tin algun hende kier tira culpa riba Endy cu Rocco, dor cu e investigacion ta tumando lugar. E no ta un culpa, e ta un honor pa nan, kendenan a sa di sirbi e pueblo aki ne forma corecto. Signala cosnan robes den bo pais no ta hacibo complice, mucho menos culpabel, pero ta hacibo liber!
SOLO DI PUEBLO ta manda pabien y forsa pa ambos parlamentario, y gradici nan pa nan trabao haci p’e pueblo. Ora bo actua corecto, sigur cu bo lo trapa riba algun hende cu gusta haci malo, y nan ta keda bati manera rabo di lagadishi. Ora bo traha bon cu bon intencion, Dios y pueblo lo recompensa boso pa boso trabao. Endy cu Rocco, dos hero nacional cu ta para pa husticia y no bagamunderia.
(Heroe defincion: Persona que se distingue por haber realizado una hazaña extraordinaria, especialmente si requiere mucho valor.)
