Kico ta mas peligroso pa un pais: un Gobierno cu tin problema pa resolve, of un Gobierno cu no tin un direccion comparti pa resolve nan? Pa lider di PPA, Otmar Oduber, Aruba ta confrontando precisamente e di dos riesgo.
Durante conferencia di prensa, Oduber a critica loke e ta considera como falta di vision, coordinacion y liderazgo dentro di actual coalicion, mientras e decisionnan importante pa economia y futuro di pais ta exigi planificacion.
“Nos a prepara prome cu eleccion”
Oduber a recorda cu PPA, despues di aproximadamente 20 aña pafor di Parlamento, a reuni un grupo amplio di profesional, pa prepara su programa electoral di 2024, cu un vision pa desaroyo di Aruba te 2050. Segun Oduber un partido serio no por spera te despues di gana eleccion pa cuminsa pensa con e lo goberna. “Bo mester sa unda bo kier hiba bo pais, prome cu bo pidi pueblo su confianza. P’esey nos si a prepara un programa pa goberna y no djis un lista di promesa pa gana eleccion” el a expresa.
Di promesa pa politica concreto
Oduber a menciona aumento gradual di salario minimo como un ehempel, mirando cu esey ta e tema cu mas ta reina den comunidad. PPA a sa di propone un trayectoria di dies aña, combina cu productividad laboral, consulta economico y e medidanan pa evita presion di inflacion.
Un otro ehempel ta regularisacion di e trahadornan indocumenta.
Segun Oduber, PPA a propone pa aborda e tema mediante un estudio di necesidad laboral, preparacion civico, idioma y conocemento di cultura Arubiano, pa facilita integracion den economia formal. “Regularisa no ta solamente entrega un papel di permiso. Ta prepara hende pa forma parti di nos sociedad y contribui na economia y harmonia di bo comunidad.”
Gobernacion no por depende di improvisacion
Oduber ta sostene cu e diferencia actual entre e partnernan di coalicion riba salario minimo, ta demostra e riesgo di forma Gobierno sin tin suficiente acuerdo riba direccion economico.
Segun Oduber, un coalicion mester tin mas cu un acuerdo pa comparti poder. E mester tin un programa comun cu ta guia e decisionnan y no manera e ta awor, cu ta parce mas di ta un matrimonio forsa. “Un pais no por depende di ken tin mas influencia of ken ta gana un discusion interno,” el a señala.
“Pueblo mester sa unda Gobierno ta hiba Aruba”
Pa Oduber, e berdadero prueba di un programa electoral ta su implementacion.
Salario, empleo, productividad, costo di bida y integracion laboral mester forma parti di un strategia coherente. “Gobernacion no ta simplemente ocupa un posicion. Bo mester sa, kico bo kier logra, con bo lo logra esey y con bo ta responsabilisa bo mes pa resultado. Pasobra un Gobierno cu no tin direccion comparti por sigui tuma decision. Pero esey no ta garantisa cu e pais ta progresando den un direccion cla” Otmar Oduber a indica.
