E Evangelio di awe ta siña nos cu nos bida mester wordo caracterisa pa un actitud positivo y di servicio. Nos mester haci nos mes tres pregunta na tur momento: Mi ta haci locual ta mi deber? Mi ta haci’e pa ricibi recompensa? Mi ta cumpli cu boluntad di Dios? Nos como siguidonan di Hesus mester ta semper disponibel pa cumpli cu nos tarea, sin spera cu tin pago of recompensa pa esaki. Nos actitud ta pa haci realidad e Reino di Dios na mundo, como sirbido di Hesus y tambe nos mester hiba un bida den humildad, si nos obra di acuerdo cu e berdad aki nos ta berdadero discipulonan di Hesus siguiendo e ehempel di Hesus na tur momento. Si na algun momento nos tambalia, nos mester pidi Spirito Santo duna nos sabiduria, y cende den nos e luz di amor pa asina nos ta portado di humildad y amor.
Oracion: Señor Hesus danki pa mustra nos Bo humildad, laga nos obra for di amor y humildad pa nos ta berdadero discipulonan di Bo Señor. Aumenta nos Fe pa asina nos cumpli cu nos deber sin spera pago of recompensa pa nos obranan. Señor, concede nos Bo inmenso amor y yuda nos pa semper nos ta fiel na Bo palabra y Bo siñansa. Amen.
