Balashi Beer Experience a celebra su apertura oficial riba diasabra 7 di november, na e compleho di entretenimiento Gloria Aruba. Markus Konings, CEO di Sandenburg Experiences, Gobernador di Aruba, drs. Alfonso Boekhoudt, accionista di MetaCorp, Eduardo de Veer y Eddie de Veer como CEO di MetaCorp a efectua e apertura oficial door di corta un cinta grandi na entrada di e edificio.
E compania mas bieu di Aruba tabata orguyoso di anuncia cu e proyecto a dura 30 luna pa keda cla, a costa nan 30 miyon florin, a percura pa 20 compania local haya trabou den e construccion y a sigura 18 cupo di trabou nobo pa e ekipo cu awo ta encarga cu e tour moderno aki. E proyecto ta ocupa un espacio di 1.300 meter cuadra den un ampliacion di Gloria Aruba. āInversion den nos propio economia ta un custumber di MetaCorp. Y ta for di e pensamento aki a nace e idea pa aƱadi un concepto nobo y moderno den e edificio di Gloria, pa por atrae mas turista den e compleho di entretenimentoā asina Eddie de Veer a duna di conoce.
Un di e momentonan destaca di e programa tabata e tour guia, durante cual Gobernador Boekhoudt a wordo acompaƱa pa Eduardo de Veer y Eddie de Veer. Durante e recorido, nan a conoce e diferente zonanan cu ta trece e historia di Balashi y su conexion cu Aruba, su cultura y su pueblo na bida.
Despues di 30 luna di desaroyo intensivo, Balashi Beer Experience ta amplia e oferta recreativo y turistico di Aruba cu un concepto cu ta combina historia, tecnologia y hospitalidad local. E atraccion ta dirigi na habitantenan adulto di Aruba, turista cu ta hospeda na nos isla y pasaheronan di crucero.
Pa medio di 12 zona di experiencia, bishitantenan ta descubri e historia tras di e marca Balashi y e ingredientenan, tradicionnan y personanan cu a contribui na su desaroyo. Proyeccionnan di video, efectonan special, ambientenan tematico y exhibicionnan interactivo ta forma parti di e recorido.
E experiencia ta bay mas leu cu cerbes so. E ta celebra e identidad Arubiano y ta mustra con creatividad, perseverancia y orguyo local a contribui na forma nos isla. For di casnan tradicional di cunucu y nos lama Caribe te na e paisahe di Parke Nacional Arikok, cada escenario ta revela un parti di Aruba y e storianan cu tin tras di dje. E tour ta culmina den un ambiente inspira pa un rumshop autentico Arubiano, unda bishitantenan por disfruta di e cultura y hospitalidad di nos isla.
E facilidad ta inclui tambe Balashi Flagship Store, cu articulo y souvenir exclusivo inspira pa Balashi y Balashi Bar, unda bishitantenan por conoce e diferente sabornan di e marca. Ambos ta accesibel independientemente di e tour, sin necesidad di cumpra un entrada pa Balashi Beer Experience.
Cu e inversion aki, MetaCorp ta sigui contribui na economia local y na desaroyo di e oferta turistico di Aruba. Pa e diseƱo di e atraccion, e compania a conta cu e conocemento di Sandenburg Experiences, un agencia specialisa den diseƱo di experiencia cu sede na Amsterdam.
Bale la pena menciona cu e ceremonia di apertura a contra cu presencia no solamente di Gobernador Boekhoudt, pero tambe ex-Gobernadornan Olindo Koolman y Freddis Refunjol, sin lubida ex-Prome Minister Nelson Oduber memey di un lista largo di personalidadnan y invitadonan special.
Pa mas informacion y reservacion, bishita www.balashiexperience.com.
