Antes un solo salario tabata suficiente: Jovito Krozendijk: Trahado di hotel merece un salario husto: Situacion no ta mescos manera antes

Jovito Krozendijk a traha den sector hotelero di Aruba pa hopi aña. Tur mainta den siman e ta riba bus pa bishita su famia cu ta biba den area di Wayaca cu Sabana Blanco. E la reflexiona riba e cambionan cu el a observa tocante costo di bida y e impacto cu esaki tin riba poder di compra di e trahadonan. Segun su experiencia, anteriormente un salario por tabata suficiente pa cubri e necesidadnan diario, pero cu e aumento di prijs di varios producto pero tambe servicio, e situacion financiero di hopi hende a bira basta dificil. “Antes salario tabata bon, pero cosnan tabata mas barata,” Krozendijk a expresa durante e combersacion.

Experiencia den sector hotelero

Krozendijk a conta di su experiencia laboral den sector hotelero, caminda el a desempeña diferente tarea relaciona cu servicio. El a referi tambe na e diferencia entre e salario minimo y entrada adicional cu algun empleado por ricibi mediante tips. Sin embargo, e aumento di costo di bida ta un preocupacion cu, segun e, ta afecta e capacidad di e trahadonan pa cubri nan gastonan mensual. Esaki ta refleha un realidad cu ta ocupa un luga importante den e debate actual: e necesidad pa evalua si pago di e trahadornan ainda ta den proporcion cu e gastonan cu un hogar mester enfrenta.

Necesidad di un mehoracion di salario

Krozendijk a expresa su apoyo pa un mehoracion cu por brinda e clase trahado un entrada digno. Su preocupacion principal ta relaciona cu e necesidad pa salario tene cuenta cu e costo di bida actual. El a señala cu e situacion di awe ta diferente for di e añanan anterior, ora cu e mesun entrada por tabata permiti un persona cubri mas di su gastonan.

Oido na bos di pueblo

E combersacion cu Krozendijk ta forma parti di e acercamento di Prome Minister Mike Eman cu diferente ciudadano riba nos isla ultimo siman, cu e intencion di scucha directamente e preocupacion di e pueblo. Diasabra madruga parlamento a pasa un  mocion cu ta urgi Gobierno pa aumenta salario minimo cu 200 florin, pa mas tarda 1 di maart 2027, acompaña pa un sistema di compensacion pa e comerciantenan. E iniciativa aki ta reafirma e compromiso pa mehora e poder di compra di clase trahador y reduci e desigualdad economico den comunidad di Aruba.