E anochi di 4 di november a bira un momento inolvidabel pa Het Arubaanse Padvindsters Gilde (APG), un evento yen di emocion y orguyo pa tur miembro presente.
E apertura a wordo realisa cu entrada di Drumband, sigui pa nos lidernan.
Nos a cuminsa e ceremonia cu nos cantica “E caminda ‘ki m’a scoge,” creando un ambiente caluroso y yen di emocion.
Instalacion di nos lidernan nobo
Un di e momentonan mas significante di e anochi tawata instalacion di nos lidernan nobo. Nos a cuminsa cu Jehdeiah, nos pionier cu a bira un Jong Lider. Sigui pa Nathesia, un Jong Lider cu a bira Lider di Padvindsters, despues Jillian, cu tambe a cambia di Jong Lider pa Lider di Padvindsters.
E ceremonia di instalacion a finalisa cu e instalacion di Angela (Radi) Angela di Grupo Maria Auxiliadora, cu a tuma oficialmente su posicion di Hoofdleidster di GMA, un paso grandi y responsabilidad pa su grupo.
Instalacion oficial di nos Drumband
Despues, Jillian y Nathesia a haci nan promesa como lidernan di Drumband, sigui pa e miembronan di Drumband cu a bisa nan promesa dilanti di nan lidernan, mustrando nan compromiso y dedicacion.
Nombramento oficial di nos lidernan
Un momento di orguyo a wordo marca cu nombramento oficial di nos lidernan di Padvindsters, cu nombernan cu ta refleha nan personalidad y esnan cu ta inspira tur esnan cu nan ta guia:
Jillian – TAVI (Tolerante, Activo, Victorioso, Integro)
Nika – ALHA (Always Happy)
Amidee – LIRCA (Leal, Integridad, Respetoso, Competencia, APG)
Nathesia – ALOVA (Activo, Leal, Optimista, Valor/Balor, Aventura)
Ceremonia di bela
Nos a cera e anochi oficial cu un ceremonia di bela cu un simbolismo profundo, acompaña pa e cantica “This Little Guiding Light of Mine” y nos Schakelspreuk cu ta refleha nos union y identidad fuerte.
Un anochi pa celebra
Despues di tur e momentonan yena di emocion, tur hende a disfruta di dushi pasaboca y co’i bebe pa comparti e alegria.
E anochi a keda marca cu un capitulo nobo pa nos lidernan, Drumband y full APG. Un etapa nobo, hopi responsabilidad y un futuro yena cu momentonan bunita.
Forma parti di Het Arubaanse Padvindssters Gilde
Bo ta desea di forma parti na un movimento yena di amistad, aventura, liderazgo y servicio na comunidad?
Het Arubaanse Padvindsters Gilde (APG) ta invita tur mucha muhe, hobennan y adulto pa bira parti di nos movimento.
Den Padvinderij bo tin e oportunidad pa:
Desaroya bo talento y habilidad
Siña traha hunto y yuda otro
Desaroya liderazgo, responsabilidad y independencia.
Crea amistadnan nobo
Participa den actividadnan educativo, recreativo, aventurero y social.
Siña diciplina
Adultonan cu tin gana di contribui como boluntario of lider, pa guia, inspira y compaña nos mucha muhe y hobennan den nan desaroyo.
APG tin 5 grupo rond di Aruba, y nos ta busca hende entusiasma y dedica pa forma parti di e famia di APG. Pa mas informacion por comunica cu nos na: apg.board.aruba@gmail.com.
Hunto nos ta traha pa un generacion di mucha muhe y hobennan mas fuerte, independiente y prepara pa futuro.
Sea Prepara!
