Diahuebs merdia Aruba Bird Life Conservation (ABC) a cuminsa contra Gobierno y Aruba Conservation Foundation (ACF). E caso ta cu ABC kier pa Hues ordena Gobierno sera e zonanan protehi pa Tour Operator, UTC y ATV pa conservacion di bestianan. Ta asina cu Andicuri Real Estate a uni cu ABC, mientras tambe a uni cu Gobierno e Tour Operators y Aruba North Coast Adventures.
SOLO DI PUEBLO por a compronde cu tratamento di e caso a caba te 6’or di atardi caminda Hues a duna e partidonan 1 siman pa papia y laga sa si a yega na un palabracion. Sino dia 9 December 2026 lo tin sentencia
ABC KIER PA GOBIERNO SERA CAMINDANAN CU BARANCANAN
Abogado mr. Rep di ABC , vs Gobierno. Companianan UTV, tour operators,en total 9 a uni, Andicuri Real Estates mr. David Kock uni cu ABS. Tin tambe ACF di Parque Arikok, Aruba North Coast Adventures. Hues a rechaza tour operators. Parque Arikok mr. Arends Marchena ta contra cu companianan di tour ta uni.
Hues a puntra abogado mr. Rep di ABC, pakico un practica cu añanan largo ta andando awor diripiente ABC ta bin cu un caso sumario pa Hues tuma decision di biaha contra Gobierno. Mr. Rep ta haya cu tin un situacion inhusto ta tumando lugar. A bogado a mustra cu tabatin caso na Mei 2026, pasobra Gobierno a pone blokeo y despues a bolbe kita esakinan. E abogado ta haya cu e camindanan habri ta afecta e proteccion di parhanan. E ta haya cu Gobierno ta duna tog permiso pa Tour Operators pasa riba un zona y ta sera banda Alto Vista. Segun e abogado, na 2022 caba DOW y otro departamentonan a indica un zona prohibi na Tera Cora y otro zona. Gobierno a bay net contra esaki. E abogado a mustra cu ta increibel cu Gobierno ta bay sinta na mesa cu Tour Operators pa habri camindanan cu DOW mes a dicidi cu mester sera. E abogado a bisa Hues cu na Mei 2026 a mira Gobierno (DOW) pone barancanan na Light House y Alto Vista. Door cu no tabatin suficiente barancanan, a keda cu lo tin fase 2 y fase 3 pa sera e otro partinan tambe. Tabatin reunion na DIP tocante seramento di otro zonanan. Na Augustus 2026 a acudi na Corte caminda Hues a bisa pa partidonan papia. E abogadoa a bisa Hues cu ABC a bay sinta na mesa cu Tour Operators y a bin menaza den direccion di Peterson di ABC. Peterson a nenga di sinta na mesa cu cierto hendenan di Tour Operators. Na October 2026, ABC a sinta cu Gobierno y a manda cartanan pero nada a sali na cla. E abogado a cuestiona e hecho cu apesar cu DOW ta bisa pa cera Tera Cora, tog Gobierno ta bisa habri e zona. Na November 2026 a sinta na mesa cu Gobierno y no a logra nada. Diamars ultimo ainda a sinta na mesa pero no a logra. Segun mr. Rep di ABC, e ruta di Tour Operators ta pasa net den e zona prohibi. Na 2019 a bin cu conservacion di zonanan di proteccion entre otro Arashi, parke nacional. E abogado a mustra cu Gobierno a bisa cu lo permiti di core riba cierto zona. Esaki a causa cu zonanan protehi ta wordo daña.
TOUR OPERATORS TA CORE RIBA ZONANAN PROHIBI
E abogado ta haya cu Gobierno no por bay haci cambio pa core riba beach y otro zonanan cu ta protehi. El a mustra cu tin raport cu tin 16 zona protehi y cu companianan di tour mester atene na esaki. Tin 3 zona cu no ta permiti pa Tour Operators core y tin rutanan indica cu si por core. Promer zona ta Light House te Alto Vista, otro ta Bushiribana, Natural Bridge y tambe na Parke Arikok. Tambe e abogado a menciona cu Tera Cora mester wordo proteha. El a cuestiona Tour Operators ilegal cu ta bay core cu turistanan riba zonanan cu ta prohibi. El a mustra cu tin raportnan di organisacionnan cu ta mustra cu mester stop cu tour na nos zonanan proteha. E abogado a mustra cu mapa cu na Tera Cora tin parhanan cu ta broei y mester proteha nan.
E abogado a pidi Hues pa ordena Gobierno pa cumpli cu e raportnan cu ta mustra e 16 zonanan prohibi y no kita e borchinan cu ta indica cu ta prohibi pa core. Tambe cu no por core riba beach, duinnan na Californa, Saliña Bruin. E abogado a mustra Hues mapanan di Aruba caminda ta mira e zonanan protehi y e marcanan caminda mester sera cu barancanan. El a mustra cu na Tera Cora, gran parti di e tereno ta tereno priva. Tin conseho negativo pa traha un caminda pa por sali for di e tereno. E abogado a demanda 10 mil florin si Gobierno keda sin cumpli. Haya cu Gobierno ta actua contra su propio maneho. Hues a remarca cu Tour Operators por pasa na banda di e barancanan y sigui core. Abogado ta kere cu si pone e barancanan di tal forma lo haci esaki imposibel.
GOBIERNO KIER MAS TEMPO PA TIN UN SOLUCION
Mr. Crouch di Gobierno a bisa Hues cu ta fastioso cu tin un caso sumario siendo cu Diamars ultimo ainda tabatin papiamento. Tabatin proposicion na Tour Operators pero nan no a reacciona. Gobierno a bisa cu si nan no ta bay di acuerdo, Gobierno lo bay tuma medidanan. E abogado a cuestiona e hecho cu pakico ABC awor ta bin cu caso sumario pa awor obliga Gobierno tuma medidanan. E abogado a remarca cu ABC ta papia di pone barancanan pero di unda ta haya esakinan. E abogado ta haya cu ABC no por bin cu caso sumario y ta manda riba Gobierno. E abogado a pidi Hues pa tene cuenta cu e temporada di fin di aña cu ta haci dificil pa bay cumpli cu exigencia di ABC. El a pidi Hues pa duna mas tempo y cu mester tene cuenta cu Polis ta core riba e camindanan pa tin control riba iregularidadnan.
MEDIDANAN MESTER TA A BASE DI LEY
Mr Arendsz Marchena di Aruba Conservation Foundation (ACF) cu ta maneha Parque Arikok ta haya cu mester proteha e zonanan y prohibi Jeeps, UTV, ATV, core. El a bisa cu e medidanan mester wordo haci a base di e caminda legal y no manera ABC ta exigi. E abogado no ta haya cu mester sera tur e caminda di biaha pero manera ley ta mustra. E abogado a bisa Hues cu naturalesa ta accessible pa tur hende tanten cu no ta daña esaki. Ta Gobierno ta esun indica pa sera zonanan y pesey mester wak con ta haci esaki. ABC ta pidi Hues pa ordena Gobierno caminda ta pone ley un banda. Gobierno ta haya cu mester haci estudio promer cu bay sera cierto partinan. Mester tene cuenta cu mester laga caminda accessible. Haya cu e ponemento di baranca manera ABC ta exigi, ta stroba e caminda pa otronan y no solamente Tour Operators cu ta haci off road. E abogado a mustra cu ACF no a pone barancanan na Parke Arikok. E ta haya cu si ta caminda publico, esey mester keda palabra cu DOW y Domeinbeheer. Mester tene cuenta e temporada cu parhanan y bestianan ta broei y e temporada ey lo por sera temporal y cu reglanan estricto riba velocidad cu ta permiti di core. E abogado a bisa cu rechaza e demanda di ABC no kiermen cu e zonanan ta core peliger sino cu ACF y Gobierno ta planea con ta cera zonanan.
ABOGADO A PROPONE MEDIACION
Abogado mr. Ruiz cu ta representa e Tour Operators ta cuestiona e hecho cu ABC kier pa awor cera zonanan. E ta comparti punto di bista di ACF. E abogado a pidi Hues pa laga partidonan por papia cu otro. El a mustra e situacion cu tabata reina cu watersports cu tabata un chaos. E abogado a mustra cu Gobierno a establece reglanan caminda si faya 3 biaha ta perde permiso di watersports. Esaki a causa cu tin watersports cu mester a sera. E abogado a bisa cu a haci proposicion di papia caminda ta bin cu reglanan estricto con Jeeps, UTV, ATV., etc ta core. Por a mira cu e abogado a actua manera un mediador pa yega na un solucion.
Hues a sera tratamento di e caso y a bisa cu e kier sa dentro 1 siman si partidonan a papia y yega na palabracion. El a mustra cu ta un bon solucion cu ta instala GPS riba vehiculonan y ora viola e reglanan, e vehiculo ta paga automatico y no ta start mas. E ora e compania lo mester bay busca e auto. Hues a bisa cu tentativo 9 December 2026 lo tin sentencia.
