Den un publicacion di 5 di november den corant, un articulo cu ta compara James Finies cu otro politiconan a declara cu Sr. Finies no tin e carisma ni e habilidad pa mantene atencion di un multitud.

Bon liderazgo, guia pa responsabilidad, humildad en bes di ego, y un vision progresivo pa futuro di un pueblo, ta dificil pa haya y no ta presenta su mes frecuentemente den bida di un hende. Esakinan ta e calidadnan cu mi ta mira den Sr. James Finies.
Mi a mir’e bandona su carera bancario despues di a traha pa casi 25 aña, protesta cu curashi dia y anochi sin stop durante 222 dia, exigiendo un referendum, y dirigi su mes na Nacionnan Uni mas di 50 biaha entre 2016 y 2026, dilanti di representantenan di 196 pais rond mundo.
Mi a mir’e participa mas di un biaha den encuentronan cu Prome Ministernan di Barbados, St. Lucia, St. Vincent and the Grenadines, Dominica, St. Kitts and Nevis, Grenada, Antigua and Barbuda, The Bahamas y Belize. Tambe cu Presidentenan di Panama, Mexico, Cuba, Surinam y Bolivia, y cu lidernan di Argentina, Chile, Bolivia, Uruguay, Paraguay, Venezuela, Colombia, Honduras, Costa Rica y Brazil.

E corant ta sugeri seriamente cu un homber cu ta capaz di dirigi su mes na publico internacional y lidernan mundial asina no por ta un lider of cu e ta carece di carisma? Tin un sistema di casta bou di e elitenan di Boneiro, caminda solamente esnan aproba pa e elitenan por bira lider?
Na december 2003, na Plaza Hotel, Raymundo Saleh, Evert Piar cu SEP, Fundacion Plataforma Economico y Gobernador di Antia Hulandes Jaime Saleh a presenta e idea y plan pa desmantela Antia Hulandes na mas di 200 persona, incluyendo lidernan y doñonan di negoshi, e elite local di Boneiro.
Ami a wordo invita personalmente pa e gerente di Ennia Insurance y a presencia con James Finies, cu tabata ey den representacion di e banco caminda e tabata traha, a lanta para y opone su mes contra e proposicion y plan aki.
El a argumenta cu Boneiro no mester separa fo’i su islanan ruman pa drenta den un relacion cu un pais Europeo cu ta miles di mia leu, cu un otro cultura, specialmente den un tempo cu Union Europeo mes tabata uniendo paisnan bisiña.
Mientras cu e lidernan Boneiriano y otro personanan a keda keto, James Finies a para su so defendiendo interes di pueblo di Boneiro.
Mi tabata testigo di con el a encontra cu Secretario General di Nacionnan Uni, António Guterres, varios biaha na Surinam, Antigua and Barbuda, Barbados y New York, caminda el a papia cu elocuencia tocante e pueblo di Boneiro y con a incorpora e isla den Constitucion Hulandes sin consentimiento di su pueblo, a pesar cu 65,5% a rechasa e status constitucional den e referendum di 2015 cu el a lucha p’e.
Mi tabata presente tambe ora el a dirigi su mes na e Embahadornan di Comite C24 di Nacionnan Uni y decenas di Mision di Nacionnan Uni di diferente pais na New York, explicando situacion di Boneiro y defendiendo su derecho pa haya proteccion di Nacionnan Uni.
E articulo tambe a compar’e cu Sedney Marten, su sostenedor di hopi tempo, un homber di integridad y lealtad cu a para na su banda pa mas di 10 aña, asta riscando su trabao pa sostene e vision di James Finies pa pone Boneiro bek riba e lista di Nacionnan Uni di Teritorionan No Autonomo.
Kico ta e motivacion tras di e tipo di comparacionnan ey?
Nan ta sugeriendo cu pasobra James Finies ta yiu di un piscado, e no por ta un lider? Sr. Finies a traha pa casi 25 aña den sector financiero, incluyendo banco comercial. Su experencia profesional, combina cu decadas di compromiso internacional, ta merece reconocemento.
Na 2017, partidonan politico UPB, MPB, M21 y Clark Abraham a sostene e decision pa ancora Boneiro den Constitucion Hulandes, un decision cu, segun mi, a debilita ainda mas e derechonan di pueblo pa goberna su mes, mescos cu prome cu 10-10-10.
Nos ta bisando cu carisma y habilidad pa convence un multitud ta mas importante cu integridad, cualificacionnan y defensa di derechonan di pueblo?
Daisy Coffie, Nina den Heyer, Thielman, e lider di M21, y Clark Abraham tur a haya oportunidad pa drecha situacion di Boneiro. Sinembargo, e problemanan ta persisti.
Aki ta trata di politiconan recicla cu a haya nan oportunidad caba y cu, segun mi opinion, a faya pa proteha y defende e pueblo di Boneiro.
Na e autor di e articulo, mi kier bisa cu ta parce cu ta abo ta carece di vision y comprension di kico ta un bon lider, locual James Finies ta representa.





