Ta hopi notabel tanto den deporte of bida artistico, un hende por tin hopi talento, pero si e no tin karakter pa sostene, tur su talento y su fama, ta cay na awa.
Bo por ta bon studia, na nivel di master, pero si bo karakter no por sostene bo, bo nivel di estudio ta baha completamente.
Bo por ta un persona bunita como hende muher, of bon tipo como hende homber , pero si bo no tin karakter pa sostene locual cu bo tin, tur bo show ta cay na awa.
Hende por halsa bo, bo por ta influencia hende, pero si bo karakter no por sostene bo influencia, bo tin problema grandi.
Mescos cu ora bo tin yamada di Dios riba bo bida, bo karakter tambe ta hunga un rol importante, pa bo cumpli cu e proposito di Dios den bo bida, corda riba e bida di Samson.
Desobediencia tin un grip hopi grandi riba karakter di hende, ora un hende ta desobediente, e ta un hende rebelde den bista di Dios, y ora hende ta rebelde, nan karakter no ta duna locual ta spera di nan.
Tin cosnan cu perhudica karakter di hende:
Un persona cu tin posicion halto , pero e ta haci redo.
Un bon deportista, pero e tin debilidad pa cu alcohol.
Un homber cu mester ta integro pero e tin varios muher.
Un lider cu tur ora tin problema pa yega na tempo.
Un bon artista , pero droga y alcohol tin e domina.
Un bon comerciante, cu vision, pero no tin control financiero.
Un lider cu no por maneha su propio cas y su famia.
Un muher bunita , pero perversidad, tin dominio riba dje.
Un homber sabi, pero cu mal manera.
Palabra di Dios ta bisa lo siguiente; Y no solamente esaki,ma nos ta regosiha tambe den nos tribulacionnan, sabiendo cu tribulacion ta produci perserverancia, y perserverancia karakter, y karakter,speransa, y speransa no ta desapunta, pasobra e amor di Dios, a wordo drama den nos curason,door di Spirito Santo,Kende a wordo duna na nos.( Romanonan 5:3-5).
Tur hende cu kier yega na algo den nan bida mester wordo purba, pa nan por alcansa locual cu nan kier, si nos wak cu tur e hombernan grandi den Bijbel a wordo purba door di Dios.
Awendia tin hende ta kere cu tur cos bo ta yega facil na dje, pero mescos cu bo tin cu pasa examen na scol, asina tambe ta den nos bida spiritual, pasobra Dios ta forma bo pa medio di prueba y chek bo calidad, prome cu e pone autoridad den bo man.
Tur locual hende kier haci pa Dios tin un preis cu mester wordo paga, y tin biaha bo tin hende hunto cu bo, pero ora nan mira e prueba cu bo tin cu pasa aden , pa cumpli cu e propisto di Dios nan ta core limpi bay laga bo, of nan ta hala atras laga bo keda bo so.
Pero esey tambe ta di Dios, pasobra hopi biaha ora nos ta den soledad eynan Dios ta papia cu nos y E ta forma nos, corda riba prueba di Elias, corda riba Abraham, y corda riba Jonas.
Den nos matrimonio y famia semper lo tin prueba cu ta hiba na crecemento pa nos cumpli cu locual Dios a manda nos.
Tentacion semper lo tey, pesey Dios ta bisa , haci oracion pa boso no cay den tentacion, nos tur sa cu nos adversario e diabel tey, pa horta, pa mata y pa destrui, pero Cristo Hesus tey pa duna bida abundante.
Pesey sea fiel na Dios.
Sinceramente, Pastor Marcel Balootje.





