Desaroyo monetario 

Den luna di september 2026, e cantidad di placa den circulacion a baha cu Afl. 10,8 miyon te na Afl. 7.633,7 miyon, compara cu augustus 2026. Esaki a resulta for di un bahada den e reserva di divisa netto (-Afl. 147,5 miyon) y un subida den e activo domestico netto (+Afl 136,7 miyon).

E desaroyo den e activo domestico netto a wordo causa pa un subida den credito domestico (+Afl. 142,6 miyon) y un bahada den transaccionnan no relata na credito (-Afl. 5,9 miyon). E subida den credito domestico a resulta for di mas credito bancario na e sector priva (+Afl. 170,6 miyon) y menos credito bancario netto na e sector publico (-Afl. 27,9 miyon). E expansion den credito bancario na e sector priva a resulta for di mas credito na empresa (+Afl. 137,6 miyon), hipoteca pa vivienda (+Afl. 17,1 miyon), y credito na consumidor (+Afl. 15,5 miyon). E bahada den credito bancario netto na e sector publico ta wordo atribui na un subida den e asina yama “gross claims” (+Afl. 11,0 miyon). 

Inflation

E nivel general di prijs, cu ta wordo midi door di e indice di prijs di consumo, a registra un subida di 3,0% den e luna di september 2026 compara cu september 2025. E contribuyente principal na e aumento aki tabata e categoria  “Transporte”. Pa loke ta trata e promedio anual di e tasa di inflacion, esaki a registra 1,3% na september 2026, compara cu 1,0% na augustus 2026.

Entrada di Gobierno

Entrada total di gobierno a suma Afl. 131,7 miyon na september 2026, cual ta Afl. 34,6 miyon menos cu e mesun luna di e aña anterior. Esaki a resulta for di un bahada den entrada no relata na impuesto (-Afl. 35,1 miyon) y un subida den entrada di impuesto (+Afl. 0,4 miyon).

E aumento den entrada di impuesto a resulta for di mas entrada for di e asina yama “transfer tax” (+Afl. 3,6 miyon) y e asina yama “turnover tax” (B.B.O./B.A.V.P.) (+Afl. 2,3 miyon) y menos entrada for di impuesto riba divisas (-Afl. 4,3 miyon) y impuesto riba entrada (-Afl. 3.2 miyon),

Turismo

Na september 2026, e cantidad di turista a registra 114.517 turista, cual ta 16.739 mas bishitante (+17,1%) compara cu na september 2025. E mercadonan Latino Americano, Norte Americano, y Europeo a crece cu 10.479 bishitante (+49,4%), 5.580 bishitante (+8,2%), y 627 bishitante (+12,2%), respectivamente. 

E relato mensual completo ta disponibel ariba website di BCA www.cbaruba.org

Tocante Banco Central di Aruba

E proposito principal di Banco Central di Aruba (BCA) ta pa contribui na stabilidad financiero y prosperidad economico di e comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel. 

Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta vigila e uzo di esaki.

Pa mas informacion tocante Banco Central di Aruba, por bishita su website www.cbaruba.org