Un paso historico den modernisacion di servicio publico na Aruba. Pa prome biaha, tur contribuyente individual por yena y entrega nan declaracion di impuesto riba entrada pa aña fiscal 2025 completamente digital, via portal BO Impuesto (BOi). Cu e implementacion aki, Departamento di Impuesto (DIMP) ta culmina un trayecto di nuebe aña di digitalisacion y automatisacion di su procesonan, marcando un avance importante den e manera cu Gobierno ta brinda servicio na comunidad.

Minister di Finansa, Asunto Economico y Sector Primario, Geoffrey Wever, ta considera e logro aki un resultado significativo di un proceso di modernisacion cu ta contribui na un administracion fiscal mas eficiente, accesibel y prepara pa futuro. Un proceso cu ta mustra con vision pa largo plazo, inversion den tecnologia y confianza den nos profesionalnan local por conduci na cambionan structural cu ta beneficia henter pais.

Cu introduccion di e declaracion digital, contribuyentenan no tin mester di yena formulario riba papel y entrega esaki personalmente na Departamento di Impuesto. Awor nan por cumpli cu nan obligacion fiscal for di comodidad di nan propio cas, na e momento cu ta mas conveniente pa nan, sin necesidad di para den rij.

“Desde cu mi a bira minister di Finansa, mi a pidi directora di DIMP pa enfoca riba e proyecto aki pa nos por logra haci aangifte digital mas pronto cu ta posibel y tambe cu nos por percura pa e restitucion tuma lugar na un manera mas rapido. Pero e importancia di e logro aki ta bay mas leu cu introduccion di un sistema digital. E ta trata di modernisa e manera cu Gobierno ta funciona y brinda servicio na pueblo”, Minister Wever a expresa.

E trayecto di transformacion di Departamento di Impuesto a cuminsa cu digitalisacion di e declaracionnan mensual. Departamento di Impuesto ya caba a lansa e portal BO Impuesto, creando e posibilidad pa empresarionan entrega nan declaracionnan mensual digital. Durante e añanan, e plataforma a sigui desaroya y amplia cu diferente servicio, incluyendo declaracion di impuesto riba ganashi y dividendo, consulta di estado di cuenta, historia di pago y posibilidad pa contribuyentenan haci nan propio areglo di pago. Den cooperacion cu e banconan, e posibilidad pa paga impuesto online via Bill Payment tambe a bira realidad.

E proceso aki no tabata simplemente implementacion di tecnologia nobo, sino un transformacion profundo den e manera di traha. Procesonan administrativo cu durante decenionan tabata depende di papel a wordo modernisa, mientras cu empleadonan a adapta na sistemanan nobo y diferente manera di atende contribuyentenan.

E resultado di e transformacion ta visibel. Segun Departamento di Impuesto, e porcentahe di cumplimento di declaracionnan mensual a aumenta di 64 porciento pa actualmente entre 80 y 90 porciento. Esaki ta demonstra cu digitalisacion no solamente ta facilita e trabou administrativo, sino tambe ta contribui na un mior cumplimento di obligacionnan fiscal.

Pa Minister Wever, e desaroyo aki ta conecta directamente cu e compromiso di Gobierno AVP-FUTURO, stipula den Programa di Gobernacion 2025-2028, particularmente den e prioridadnan relaciona cu Sector Publico y Bon Gobernacion, Finansa Publico y Innovacion. Un di e obhetivonan di Gobierno ta pa modernisa e aparato gubernamental, implementa E-government y fortalece e calidad y eficiencia di servicio publico.

Den e vision aki, modernisacion di Departamento di Impuesto ta representa un paso concreto den e direccion di un Gobierno cu ta traha mas eficiente, cu ta facilita cumplimento di obligacionnan fiscal y cu ta sigui fortalece su administracion financiero. Un sistema fiscal moderno y bon organisa ta esencial pa un maneho responsabel di finansa publico y pa e funcionamento adecua di nos pais.

Un aspecto importante di e logro aki ta e participacion di contribuyentenan. Te na momento di e anuncio, 25.196 contribuyente a registra nan mes den portal BO Impuesto, representando 46 porciento di tur contribuyente activo pa impuesto riba entrada. E cifra aki ta refleha e progreso cu Departamento di Impuesto a logra den e transicion digital y e cooperacion di comunidad pa adopta e sistema nobo.

Un reconocemento special ta bay na directora di Departamento di Impuesto, sra. Luenne Gomez-Pieters, y henter su team di profesionalnan, kende durante añanan a traha cu dedicacion y perseverancia pa realisa e transformacion aki.

“Mi kier felicita directora Luenne Gomez-Pieters y henter e team di Departamento di Impuesto pa e logro extraordinario aki. Nuebe aña di perseverancia, dedicacion y trabou duro a produci un resultado cu awe henter Aruba por beneficia di dje. Esey merece nos reconocemento y aprecio. E ta un demostracion di e capacidad y talento cu nos tin den nos propio institucionnan. Como Minister di Finansa, mi ta sinti mi particularmente orguyoso di e profesionalnan cu diariamente ta contribui na modernisacion y fortalecemento di nos administracion fiscal”, Minister Wever a enfatisa.

E logro ta refleha igualmente e contribucion di Ministerio di Finansa, Directie Financien, Directie Economische Zaken y otro partnernan cu durante e añanan a contribui na evaluacion y sosten di e inversionnan necesario pa e proceso.

Minister Wever ta considera importante cu e progreso digital ta accesibel pa tur ciudadano, incluyendo esnan cu tin menos experiencia cu tecnologia. Pa e motibo aki, Departamento di Impuesto ta continua ofrece asistencia na contribuyentenan cu ainda no a registra nan mes den e portal.

E proximo sesionnan di asistencia ta tuma luga dia 24 di november na MFA Santa Cruz, 25 di november na MFA Paradera y 3 di december na Teresita Center na San Nicolas. Contribuyentenan por registra nan mes y haya mas informacion via www.impuesto.aw.

Cu un cuenta di BOi, contribuyentenan por entrega nan declaracion digital, consulta nan estado di cuenta y pagonan, solicita areglo di pago y descarga informacion pa nan propio administracion. E sistema digital ta facilita tambe un procesamento mas rapido di restitucionnan.

Cu e ultimo implementacion aki, Departamento di Impuesto ta completa un fase importante di su transformacion digital. Pa Minister Wever, esaki ta un ehempel concreto di con continuidad, inversion den capacidad institucional y confianza den nos profesionalnan por produci resultadonan duradero.