E Ministernan di Salubridad di Aruba, Corsou y Sint Maarten, hunto cu e Minister di Cuido di Largo Duracion, Hubentud y Deporte di Hulanda, a reuni diahuebs 19 di november 2026 pa e Vierlandenoverleg Volksgezondheid. Durante e encuentro anual aki, e cuater paisnan ta haci acuerdo tocante cooperacion den maneho di salubridad den Reino Hulandes.
E cuater paisnan ta coopera riba diferente tereno pa bienestar y salud di tur habitante di Reino Hulandes. Durante e encuentro di e aña aki, e Ministernan a pone atencion special riba tres tema importante.
Un di e prioridadnan ta pa sigui fortalece salubridad publico mediante e red di cooperacion Dutch Caribbean Public Health Expertise Network (DuCaPHEN). Tambe a tuma pasonan pa modernisa legislacion y regulacion relaciona cu cuido di salud involuntario. Ademas, e paisnan lo intensifica nan cooperacion pa atende e falta di profesionalnan den sector di cuido den e parti Caribense di Reino Hulandes.
Fortalecemento di salubridad publico
Durante e Vierlandenoverleg, e participantenan a evalua cu aprecio e resultadonan cu a logra durante e tres añanan di existencia di Dutch Caribbean Public Health Expertise Network (DuCaPHEN). E red di cooperacion aki ta contribui na fortalecemento di salubridad publico na e islanan CAS y BES, mediante capacitacion, intercambio di conocemento y sosten. Ademas di combati enfermedadnan infeccioso, DuCaPHEN ta enfoca tambe riba prevencion y promocion di un estilo di bida saludabel.
E paisnan a yega na acuerdo pa sigui desaroya e cooperacion den e red aki. E acuerdonan ta relaciona, entre otro, cu investigacion, capacitacion, sosten pa capacidad di personal, monitoreo y logistica.
Modernisacion di legislacion y regulacion pa cuido di salud involuntario
E legislacion relaciona cu cuido di salud involuntario ta den proceso di modernisacion. E cuater paisnan ta considera importante pa e diferente regulacionnan nacional ta mas den harmonia cu otro.
Pa e motibo aki, durante e Vierlandenoverleg, e cuater Ministernan a firma un onderlinge regeling (regulacion mutuo), cu ta confirma e acuerdonan di cooperacion entre e organisacionnan cu ta brinda cuido di salud den e tereno aki.
Atencion pa e falta di profesionalnan den sector di cuido den Caribe
E falta creciente di profesionalnan den sector di cuido den e parti Caribense di Reino Hulandes ta un motibo di preocupacion. Pa atende e situacion aki, e Ministerionan involucra cu salubridad y enseñansa di e cuater paisnan lo intensifica nan cooperacion cu institucionnan educativo y organisacionnan di cuido.
Entre e puntonan di atencion ta e mehoracion di oportunidadnan pa studiante ingresa y progresa den formacionnan relaciona cu sector di cuido, como tambe pa stimula e regreso di studiantenan cu ta sigui formacion den e sector aki.
Compromiso conhunto
E cuater Ministernan a finalisa e encuentro anual cu firmamento di e conclusionnan final di Vierlandenoverleg. Cu e firma aki, e Ministernan a confirma nan compromiso cu e cooperacion den maneho di salubridad entre e paisnan di Reino Hulandes pa e proximo aña.
Minister Melvin Wyatt-Ras (Aruba): “Nos fortalesa no ta den e tamaño di nos sistemanan di cuido individual, sino den loke nos por logra hunto. Como cuater pais, nos ta enfrenta hopi di e mesun desafionan den salubridad publico, pero cada un di nos ta contribui cu conocemento y experiencia valioso. Door di traha hunto, nos por transforma nos compromiso comparti den solucionnan concreto cu ta fortalece cuido di salud y mehora bienestar di e personanan pa kende nos ta traha.”
Minister Tyron Boekhoudt (Corsou): “E desafionan den sector di cuido no ta para na frontera di nos paisnan. Precisamente pa e motibo aki, cooperacion den Reino Hulandes ta asina importante. Pa Corsou, e enfasis ta riba prevencion, acceso na cuido di salud y fortalecemento di nos capacidad den sector di cuido. Compartiendo conocemento y experiencia cu otro, nos por traha hunto riba solucionnan concreto. Finalmente, loke ta conta ta cu nos habitantenan haya e cuido cu nan merece, tanto awe como den futuro.”
Minister Claret Connor (Sint Maarten): “Aunke cada un di nos paisnan tin su propio desafionan y prioridadnan specifico, nos ta comparti e responsabilidad pa garantisa cuido di salud accesibel, sostenibel y di calidad halto pa nos habitantenan. E fortalesa di nos cooperacion ta den nos capacidad pa intercambia conocemento y experiencia specialisa, fortalece capacidad local y transforma nos acuerdonan conjunto den mehoracionnan concreto pa nos comunidadnan. Mi ta spera cu nos lo sigui amplia e cooperacion aki, cu respet pa e necesidadnan y circunstancianan specifico di cada pais.”
Minister Mirjam Sterk (Hulanda): “Mi ta sinti orguyo y gratitud pa e cooperacion entre e paisnan. Nos a tuma un paso importante den e modernisacion di legislacion y regulacion pa cuido di salud involuntario. Mi ta impresiona cu e resultadonan di e red di cooperacion di e cuater paisnan cu ta dedica su trabou na salubridad publico. Solamente cu suficiente profesionalnan den sector di cuido nos por brinda bon cuido y sosten. P’esey nos lo traha hunto pa atende e falta di profesionalnan den sector di cuido den e parti Caribeño di Reino Hulandes. Nos tin un meta importante den comun, y esaki ta bienestar y bon salud pa tur habitante di Reino Hulandes.”














