Oranjestad – Diamars un dia hopi druk na Corte di Husticia. De oranan di mainta caso Kinikini y den oranan di merdia Hof lo sigui trata caso Ibis.
Segun Hof a cuminsa mustra cu tin diferente reaccion di recherche ariba e raport financiero di e expertonann accountant cu a senjala fayonnan den calculacion.
Procurador General ta bisa cu a keda prueba labamento di placa di mas cu 209 mil florin di Melony su negoshi. For di investigacion financiero a constata cu e circulacion di placanan ta dudoso. E la mustra cu Melony mes a declara cu e no sa con e calculacion di placanan a sosode y cu e ta manda su recibonan pa su accountant. Segun PG a base di e accountant a haci un investigacion y a constata cu mas di 209 mil florin tabata di mas. E ta gasta mas di loke e tin na entrada. Esaki a keda mustra den Corte di Prome instancia. Melony a bisa cu e ta di acuerdo cu e investigacionnan haci. Procurador General ta conclui cu Paesch tabata tin sumanan grandi cu no por splica di unda nan lo a bin, mas cu 209 mil florin di mas cu loke e administracion ta mustra. Esey a crea sospecho di labamento di placa.
Abogado mr Illes na su turno a bisa cu ta acusando Melony di a laba 209 mil florin. Melony Croes Paesch a desmenti di a laba placa manera Procurado General ta pretende. E la mustra cu e investigacion cu belasting a haci, den corte a keda dicidi cu no tin indicacion di labamento di placa. E ta haya cu Melony Paesch a duna splicacion riba su entradanan y cu tin entradanan legal cu por verifica esaki. Pesey a laga traha un raport di accountant. Investigacion di accountant ta mustra cu tabata tin fayo di parti Ministerio Publico den calculacionnan haci. Door di esey Ministerio Publico a admiti di a haci fayo y a baha di 209 mil florin te na 111 mil florin. P.G. (Procurado General) ta pretende cu Paesch no a haya ganashi manera e ta mustra y cu ta basa riba demanda e tabata bende telanan y asina a crea un ganashi.
E 111 mil florin cu P.G. ta pretende di ta placa laba, ta pasobra segun P.G., e negoshi di Paesch no por a produci e suma aki. Tin entradanan for di fuentenan legal y no por papia di labamento di placa.
Hof a cera tratamento di e caso IBIS y a bisa cu 12 di october pa 1’or y mey via video conference lo dicta sentencia.
