Ta conoci pa tur hende cuanto efecto telefon tin riba bida di mucha, mas tempran bo duna un mucha su propio telefon, mas atencion bo mester tin pa e mucha.
E telefon ta asina adictivo, cu bo ta nota un cambio den un mucha su comportacion ora e no por hanja su telefon, of ora comunicacion di internet ta slow.
Pero tin cosnan ta sosode cu mayornan mester ta na altura.
Por ehempel bo a cumpra un telefon pa bo yiu, bao di cual condicion?
Como mayor bo a splica bo yiu cu bo por tume e telefon bek for di dje, como un medida di displina, si bo ripara cu lesnan no ta bayendo bon , of e telefon ta hinke den problema cu otro persona? (Proverbio 19:18)
Ta conoci den hopi cas, cu tin mucha no ta drumi anochi, pasobra henter anochi nan ta bezig na telefon.
Y ta mey anochi ta e momento cu mensahe nan pornografico ta drenta y potret nan ta cruza di un telefon pa otro. (Proverbio 20:11)
A yega tempo pa mayornan tuma nan autoridad pa kita e telefon for di nan yiu anochi. (Proverbio 22:6).
Si un mucha berdaderamente ta bay drumi 9pm pa 6am pa e lanta bay scol , sabi cu durante e oranan cu e ta drumi e no tin mester di telefon, pasobra hende na soño no por papia na telefon.(Prov 19:23).
Tur mayor ta responsabel pa lanta nan yiu mainta pa e bay scol.
Un mayor mester keda semper cu e autoridad di por tuma e telefon bek for di su yiu y controla , kico ta pasando den e telefon y tambe controla via internet cual ta e site nan cu e mucha ta bishita, pa evita cu su yiu cay den problema di adiccion na wega riba telefon, bishitando site nan di gang riba telefon, hasta satanismo riba telefon.
Pa medio di esaki hopi mayor lo compronde dicon tin tanto cos straño ta pasa bao di hubentud.
Hopi hende ta pensa cu solamente nan yiu por ta bezig cu pornografia riba telefon , pero tambe tin otro cosnan , entre otro scucha musica di rap violento, y inmoral cu un contenido hopi halto di palabra sushi.
Esaki ta un di motibo nan di violencia bao di hubentud.
Telefon riba su mes ta bon , pasobra e ta un medio di comunicacion hopi util, pero e tin su peligro cune ora e wordo mal usa.
Pesey nos ta haci un yamada riba tur mayor, pa tira un bista den bo yiu su telefon, y busca manera pa bo por controla e telefon cu bo a cumpra pa bo yiui, pasobra bo no por duna un mucha algo cu abo mes como mayor no sa con e ta funciona.
Hopi mayor tin e problema grandi cu nan no tin acceso na e telefon di nan yiu, ni sikiera pa contesta un yamada, corda pa controla locual e yiu ta ricibi.
Mayor bo yiu ta coriendo un risico hopi grandi y ta tempo pa abo sea resposabel y tuma accion.
Sinceramente
Pastor Marcel Balootje.
