ORANJESTAD – Na caminda pa conferencia 35 aña Status Aparte cu lo tuma luga dia 23 di November, Prome Minister Evelyn Wever-Croes, a tene un encuentro sumamente agradabel cu sindicatonan activo e tempo ey pa combersa cu nan considerando nan rol hopi importante den Status Aparte. Sindicatonan presente tawata señor Chando Pietersz, señor Jaime Mata, señor Sabino Boekhoudt, señor Leo Yarzagaray y señor Anselmo Pontilius.
Durante e encuentro aki Prome Minister a tuma e oportunidad pa elabora cu e representantenan sindical presente riba tur e logronan di e tempo ey y combersa riba con lo mester sigui pa futuro. Formacion y educacion di e pueblo ta keda un punto sumamente importante, especialmente pa refleha y mira tur loke e tempo ey a logra y loke no a logra. Tambe a elabora riba e importancia pa inverti mas den educacion y den proteccion di naturalesa y pa crea un Aruba di ciudadanonan cu ta stima y ta critico den mantene nan pais pasobra ta asina so por garantisa un Aruba cu lo ta mes orguyoso di nan Status Aparte.
Sr. Chando Pietersz cu tabata un representante sindical e tempo ey, a splica cu pa nan e ta un honor di por a elabora ampliamnete cu Prome Minister den cuadro di 35 aña di Aruba su Status Aparte. Sr. Pietersz a splica cu durante e reunion a purba di refleha riba e significacion di Status Aparte pa Aruba y pone enfasis riba tur e puntonan cu ta rekeri un respuesta den futuro, pa asina por wak den ki sentido por engrandece pais Aruba.
Na final di e encuentro, Premier Wever-Croes a gradici tur e representantenan sindical pa nan presencia y pa comparti historia di e lucha di Status Aparte.
