Pa algun dia caba por constata cu sindicatonan uni den lucha di 12.6, ta parse hendenan cu no kier rasona y peor ainda, nan ta troce e berdad, cometiendo asina un misleiding di informacion y situacion na nan miembronan.
Esaki parce ta algo cu ta wordo hasi intencionalmente, a proposito, pa asina lanta emocionnan di rabia den nan miembronan. Sigur e ta un tactica pa hiba un lucha, pero cu otro agenda, basa riba engaño. Cu algo nan mester instiga y nan kier usa 132 empleado, cu 8 miyon di vacatura pa purba na crea rabia y odio.
Y dicon otro agenda? Pasobra ta partido di oposicion a cuminza e critica infunda aki, y por observa cu awor sindicatonan ta ripiti e mes un critica infunda cu un partido di oposicion.
Kico te Storia di 8 miyon di vacatura?
Segun sindicato, gobierno a sigui duna 132 hende trabao den gobierno y nan ta categorisa esaki den forma mentiroso como “friends & family”.
Ni maske cuanto ves Minister Maduro a sali den prensa y a duna e informacion corecto, sindicatonan Simar y su club ta keda ripiti nan storia fabrica y ta parce un mucha den su trun trun cu no kier rasona.
Ken a wordo tuma na trabao y dicon?
Hulanda por medio di su fiansa na Aruba a pone varios condicion cual un di nan ta “landspakket”. Landspakket den su pagina numner 1, ta skirbi cu gobierno no mag di sacrifica “orde diensten” o sea departamentonan essencial. Mester garantisa cu e departamentonan aki ta keda operational y funccionabel pa seguridad di pais.
132 trahador den servicio:
Corectamente Gobierno a tuma 132 persona na trabao, pa departamentonan essencial, manera KIA, Arumil, Polis y Aduana como tambe na Rampen Bestrijding pa deal cu covid. Recientemente na Aduana 17 persona a cuminza klas.
Trocemento di sindicatonan y sin prueba:
Den un reciente comunicado di sindicato diabierna ultimo, nan a skibri:
“CAFT a pidi gobierno di Aruba pa kita e 8 miyon cu tin poni riba presupuesto pa tuma mas personal den servicio. Akinan ta sconde cu ta pa Jena vacatura pa funccionnan esencial. Esaki ta yama trocemento di e berdad y ta leuw ta berdad. “
Pues sindicatonan ta keda persisti riba nan menrira, sin presenta prueba, sin kier drenta den e comicion di Gobierno pa nan haya tur informacion, y deliberadamente kier sigui ripiti un informacion robes, pa causa sensasion.
Corectamente Minister Maduro, na dado momento a puntra Hulanda: Ken te capitan di e barco? Ambtenaarnan di Knops ta impone un landspakket pa garantisa orde diensten y CAFT ta pidi pa elimina e trahadornan cu mester garantisa e orde dienstennan.
Instigacion:
Ta comprendibel cu sindicatonan cu no ta serio, kier usa e tema aki pa lanta emocion. Kisas ta wega sindical. Pero nan mester ta bon na altura, cu un mentira, nan engaño pa nan miembronan, no ta mustra nan sinceridad. Pasobra cu acto asina bo ta mustra cu bo no ta sincero!
