Una bes e palabra di Dios ta bisa nos den 1 Corintionan 6 vers 19 : Of boso no sa cu boso curpa ta tempel di Spirito Santo kende ta biba den boso, kende boso tin di Dios, y cu boso no ta pertenese na boso mes .
Hopi hende ta kere cu Dios ta wak nan curazon so, y no ta wak kico nan ta haci cu nan curpa, y ta lubida cu mal pensamento, inmoralidad y perversidad ta sali for di curazon di hende, pero ta wordo practica cu nan curpa.
Pesey e palabra di Dios ta bisa cu nos tin cu warda nos curazon riba tur cos pasobra ta for di dje ta bini bida, ora e curazon ta malo henter e curpa ta malo.( Prov 4:23)
Ora un hende comete un hecho di maldad no ta solamente e a hacie por ehempel cu su mannan pero su curazon tambe a participa den e asunto. ( Salmo 24 :4).
Ta pesey e palabra di Dios ta bisa cu Dios ta duna nos un curazon nobo, na e momento cu nos entrega nos bida na Hesus Cristo, y E lo cambia e curazon di piedra y hacie un di carni. (Ezekiel Capitulo 36 vers 26+27).
Si un hende ta bisiti desformal, casi sunu,pensando cu esey ta moda y elegancia y asina provoca tentacion den otro hende, e bistimento ta na a su curpa , pero e deseo ta den su curazon.(Lucas 16:15 y Mateo 15:19).
Ora un hende ta insulta, haci redo, papia malo, biba den pasado di otro, murmura constant, e tin haci un chek up di su curazon dilanti di Dios, pasobra ta den su curazon tur cos ta cuminsa, pasa pa su mente y sali na su boca.( Romanos 2:5).
Pesey nos tin di lanta nos hubentud sano, cada mayor mester tuma e curashi di papia cu yuinan di Cristo Hesus, y no laga cos bay , manera hende iresponsabel, pero corda riba e mandato di di Dios den Efesios capitulo 6 vers 4 y Malaquias 4 : 6)
E curpa cu Dios a duna nos no ta pa wordo destrui, cu droga y alcohol, y hopi otro cos mas, e no ta pa inmoralidad, e no ta pa prostitucion y idolatria,e ta pa alaba y glorifica e nomber di nos Señor.
Semper nos ta tende e palabra di hende cu ta bisa : Esaki ta mi curpa ami sa kico mi ta haci, ningun hende no tin nada di bisami, esey ta un error di rebeldia , cual no ta para scirbi ningun caminda, pasobra di berdad nos curpa ta tempel di Spirito Santo, pesey nos tin di respeta nos curpa , pa hende respeta nos.( 1 Corintionan 3 vers 16-19).
Ora un hende compronde cu e no ta doño di su curpa , y cu ta Dios ta doño di tur cos, mesora e ta haña sa dicon ora e ta malo, e ta yama riba e nomber di Dios pa sanacion, pasobra e no ta doño di su mes, ta Dios por trece sanacion den e curpa cu E a forma.
Awor nos ta compronde dicon tin tanto problema , y tanto falta di respet y caida di norma y balor pa motibo, cu hopi no sa, of nan a lubida of ta haci bofon ,cu nan curpa no ta di nan. E ta propiedad di Dios.
Dios tene misericordia,
Pastor Marcel Balootje.
