El a pidi Hues pordon na yoramento.
ORANJESTAD – Awe mainta Fiscal di Ministerio Publico a exigi 12 aña di prison pa Rudy “Elvis” Weert (61). Fiscal ta haya Weert culpable di a abusa di 3 mucha y a laga haci 2 abortus.
Solo di Pueblo por a compronde cu Fiscal a bin cu dos caso contra Weert. E promer caso ta relaciona cu e denuncianan haci door di e dama G.(27) for di Hulanda. El a denuncia cu tempo cu e tabata biba cu su mama serca Weert, el a wordo abusa door di Weert for tempo cu e tin 14 aña na 2005 te 2009. El a sali dos vez na estado door di Weert y Weert a pone haci abortus.
E otro caso ta di e dos yiunan di e partner actual di Weert, kendenan tambe ta bisa cu Weert a abusa di nan.
Ta asina cu via video conference e dama G. tabata sigui e caso for di Hulanda. Durante tratamento di e caso a sali na cla cu G., despues di a sigui un serie di tratamento na Hulanda, a dicidi di haci denuncia na autoridad di Aruba, contra Weert.
Dia 20 Februari. 2019 e dama G. (27) biba na Hulanda a haci denuncia contra Weert. El a bisa cu Weert ta un abusador y e kier pa sera Weert pa stop di abusa di muchanan jong
WEERT TA ADMITI DI A ABUSA
Ta asina cu Weert a admiti di a tene relacion sexual cu mucha y tambe cu a haci abortus. Di dos biaha ta Weert mes a haci’e pasobra Weert a bisa cu G. no por haya baby. Hues a lesa mensahe whatsapp di G. pa Weert caminda Weert a bisa cu el a enamora di G. y e sa cu el a haci malo di abusa di G. G. a bisa cu Weert tabata menace y no kier a stop. Weert a bisa cu e tabata stima G. masha hopi y pesey no kier a perde. G. a bisa cu e tabata sinti’e malo pasobra e tin relacion cu Weert siendo cu Weert ta cu su mama. Weert a bisa cu nan tur dos ta fout, un mas cu e otro. Weert a admiti cu e no a haci bon di tene relacion cu G. tempo e tabatin 14 aña. G. a bisa cu Weert a us’e manera e ta haya ta bon y tabata menaza G. pa no bisa nada. G. a bisa Weert cu el a haci’e hopi dolor. A confia Weert manera un tata pero Weert a abusa di e confianza. Weert a bisa cu e asunto aki ta traha ainda riba dje.
RAPORT DI PSYCOLOGO
Raport di psycologo riba Weert ta conclui cu Weert tin actitud narcista, anti social pero no pedofile. Ademas ta alcoholico. E psycologo ta mustra cu Weert no ta mira cu e ta fout y ta egoista. E ta mustra cu Weert tin suficiente inteligencia pa sa kico ta bon of malo. Pero door di su actitud narcista, e no ta mira e consecuencia cu e ta causa. Psycologo ta haya cu pa un parti Weert no ta responsabel pa su actonan. E ta haya cu Weert mester haya ayudo obligatorio pa stop tene relacion cu muchanan. E psycologo a bisa cu Weert tin trauma di cosnan cu lo a pasa cun’e den internaat na Curacao.
FISCAL
Fiscal ta haya cu aki tin violacion di 3 mucha entre 14 y 16 aña. Ademas 2 abortus. Como padastro mester a distancia su mes pero a tene relacion cu muchanan cu ta yiu di su partner. Fiscal ta haya cu mirando seriedad di e casonan aki exigi 12 anja.
PIDI PORDON
Weert a pidi Hues pordon. El a cuminsa yora y bisa cu ultimo 3 aña e no ta bebe. El a bisa cu e tin 10 aña di relacion y ta duda cu su partner lo bay sinta warda 12 aña. E ta realisa cu el a haci malo pero awor e ta wordo pinta como un monster pero e no ta un monster. E ta desmenti di a mishi cu e muchanan B. El a bisa cu ta duele loke haci. El a pidi pordon na comunidad. El a bisa Fiscal pa lesa Mateo 14 y 15 di Bijbel. Segun Weert, el a reforma su mes den oracion. El a bisa cu Dios ya a pordon’e.
Hues a bisa cu dia 18 Februari 2022 pa 8.15 lo tin sentencia.
